जिल्हाधिकाऱ्यांकडून अधिकाऱ्यांना धडे

पुणे, ता. २ : ‘तुमच्यावर कारवाई करण्याची इच्छा नाही, पण वेळेत काम झाले पाहिजे,’ हे सांगितले जिल्हाधिकारी जितेंद्र डुडी यांनी मंडल अधिकाऱ्यांना. जिल्हाधिकारी कार्यालयात पहिल्यांदाच महसूल अधिकाऱ्यांच्या बैठकीला जिल्ह्यातील सर्व मंडल अधिकाऱ्यांना बोलावण्यात आले होते, त्यावेळी जिल्हाधिकाऱ्यांनी अधिकाऱ्यांना कामकाजाचे धडे दिले.
जिल्हाधिकाऱ्यांच्या अध्यक्षतेखाली आठवड्याच्या सुरुवातीला महसूल अधिकाऱ्यांची आढावा बैठक घेण्यात येते. यावेळी जिल्ह्यातील १५४ मंडल अधिकारी या बैठकीस उपस्थित होते. जिल्हाधिकारी डुडी यांनी नागरिकांना विविध फेरफार वेळेत मिळाले पाहिजेत, पाणंद रस्ते वाढविले पाहिजेत, ई-हक्क व ई-चावडीचा वापर मोठ्या प्रमाणात झाला पाहिजे, महसूल वाढवला पाहिजे, नागरिकांना तातडीने सातबारा उतारे मिळाले पाहिजेत, मागील सहा महिन्यांचे पुनर्वसन संकलन नोंदी तयार करणे आणि सर्व अभिलेख ऑनलाइन उपलब्ध करून देण्याबाबत सूचनाही दिल्या. जिल्ह्यातील सर्व मंडल अधिकाऱ्यांच्या दप्तर तपासणी पुढील २० दिवसांत केली जाणार आहे. यावेळी काही चुकीचे आढळल्यास थेट कारवाई होईल, असेही स्पष्ट करण्यात आले.