देखावे पाहण्यासाठी आलेल्याच्या रिक्षाची चोरी

पुणे, ता. ३ : सहकुटुंब गणेशदर्शन आणि विविध मंडळांचे देखावे पाहण्यासाठी आलेल्या एकाची रिक्षा चोरून नेल्याची घटना शनिवारवाडा परिसरात रविवारी घडली. याप्रकरणी चोरट्यांवर विश्रामबाग पोलिस ठाण्यात गुन्हा दाखल केला आहे.
याबाबत एका रिक्षाचालकाने फिर्याद दिली आहे. पोलिसांनी दिलेल्या माहितीनुसार, फिर्यादी रिक्षाचालक हे रविवारी दुपारी कुटुंबीयांसोबत देखावे पाहण्यासाठी आले होते. त्यांनी त्यांची शिक्षा शनिवारवाडा परिसरात लावली व ते देखावे पाहण्यासाठी गेले. चोरट्यांनी बनावट चावीचा वापर करून रिक्षा चोरून नेली. देखावे पाहून रिक्षाचालक तेथे आला. तेव्हा रिक्षा जागेवर नसल्याचे आढळून आले. त्यानंतर त्याने पोलिसांकडे तक्रार दिली. पोलिस हवालदार कोकाटे तपास करत आहेत.

दुचाकीची चोरी
देखावे पाहण्यासाठी आलेल्या तरुणाची दुचाकी चोरीला गेल्याची घटना घडली आहे. हा तरुण शनिवारवाडा परिसरात दुचाकी लावून देखावे पाहण्यासाठी गेला होता. याबाबत त्याने फरासखाना पोलिस ठाण्यात फिर्याद दिली आहे. तक्रारदार तरुण वाकड परिसरात राहायला आहे. शनिवारी तो मित्रासोबत देखावे पाहण्यासाठी आला होता. शनिवारवाडा परिसरातील सूर्या रुग्णालयाजवळ त्याने दुचाकी लावली. दुचाकी चोरून चोरटे फरार झाले.