मगरपट्टासिटी गणेशोत्सवात अवयवदानाबाबत जनजागृती

पुणे, ता. ३ : अवयवदानाबाबत जनजागृती होण्यासाठी ‘नोबल हॉस्पिटल्स ॲण्ड रिसर्च सेंटर’ने मगरपट्टा सिटी येथील गणेशोत्सवात सहभागी होऊन प्रबोधनात्मक कार्यक्रम आयोजित केला होता. यामध्ये सेंटरचे समूह कार्यकारी अधिकारी डॉ. संजय पठारे यांनी ‘अवयवदानाबाबतचे मिथक आणि तथ्ये’ या विषयावर मार्गदर्शन केले. यात ५०० हून अधिक नागरिकांनी भाग घेतला.
डॉ. पठारे यांनी अवयवदानाबाबत असलेल्या गैरसमजुती दूर करत अवयवदानाचा प्राप्तकर्त्यांवर होणाऱ्या जीवनदायी परिणामाबाबत माहिती दिली. यावेळी हॉस्पिटल्सतर्फे १२ विशेष आरोग्य शिबिरांची घोषणा करण्यात आली. या शिबिरांमध्ये हृदय, स्तन आरोग्य, गुडघे आणि मणक्याच्या समस्या, आयव्हीएफ, हर्निया, मधुमेह, युरॉलॉजी, अस्थमा, मौखिक आरोग्य, फिजिओथेरपी, मूत्रपिंड आरोग्य आणि पोटांचे आरोग्य आदी तपासणी केली जाईल.
सेंटरचे संचालक डॉ. दिविज माने म्हणाले, हा उपक्रम म्हणजे सांस्कृतिक उत्सव आणि सामाजिक जबाबदारीचा उत्तम मिलाफ होता. ज्ञान, करुणा आणि समुदाय केंद्रित आरोग्यसेवेचे महत्त्व याद्वारे अधोरेखित करण्यात आले. सेंटरचे अध्यक्ष व व्यवस्थापकीय संचालक डॉ. दिलीप माने म्हणाले, नागरिकांचे आरोग्य जपणे ही आमची प्राथमिक जबाबदारी आहे. अवयवदान आणि त्याचे समाजाला होणारे फायदे याबद्दल जागरूकता निर्माण करण्याचा हा आणखी एक प्रयत्न आहे.