गणेशोत्सवामुळे मेट्रोला बरकत ! तेवीस लाख प्रवाशांकडून तिजोरीत ३ कोटी १४ लाखांची भर

पुणे, ता. ३ ः गणेशोत्सवाच्या निमित्ताने गेल्या सात दिवसांत मेट्रोने प्रवास करणाऱ्या प्रवाशांची संख्या मोठ्या प्रमाणात वाढली आहे. या कालावधीत तब्बल २२ लाख ७५ हजार प्रवाशांनी मेट्रोने प्रवास केला आहे. त्यामुळे मेट्रोच्या तिजोरीत ३ कोटी १४ लाखांची भर पडली आहे.
शहरातील गणेशोत्सवासाठी उपनगरांतील प्रवाशांना मेट्रोमुळे आता थेट महात्मा फुले मंडईत येण्याची सुविधा उपलब्ध झाली आहे. त्यामुळे शहराच्या मध्य भागातील गणपतींचे दर्शन त्यांना सुलभ झाले आहे. त्यामुळे स्वारगेट, शिवाजीनगर, कसबा पेठ स्थानकेही सध्या प्रवाशांनी गजबजली आहेत. महात्मा फुले मंडई स्थानकावर प्रवाशांची सध्या एवढी गर्दी होत आहे की, त्यामुळे कसबा, शिवाजीनगर स्थानकांचाही प्रवाशांनी वापर करावा, असे आवाहन मेट्रोला करावे लागले आहे. पिंपरी-चिंचवड आणि परिसरातून येणाऱ्या तसेच रामवाडीपासून येणाऱ्या प्रवाशांना मेट्रो सोयीची ठरत आहे. अनेक नागरिक त्यांची वाहने रामवाडी, पिंपरी-चिंचवड, फुगेवाडी, दापोडी, वनाज आदी स्थानकांवर लावून तेथून पुढे मेट्रोने शहरात येण्यास पसंती देत आहेत.
मेट्रोची एरवी रोजची सरासरी प्रवासी संख्या २ लाख १० हजार असते. परंतु, गणेशोत्सवाच्या कालावधीत सरासरी रोजची प्रवासी संख्या ३ लाखांच्या पुढे गेली आहे, अशी माहिती महामेट्रोचे जनसंपर्क अधिकारी चंद्रशेखर तांभेकर यांनी दिली.
------------
गणेशोत्सवातील प्रवासी संख्या
२७ ऑगस्ट ः २ लाख २८ हजार
२८ ऑगस्ट ः २ लाख ३६ हजार
२९ ऑगस्ट ः २ लाख ६० हजार
३० ऑगस्ट ः ३ लाख ६८ हजार
३१ ऑगस्ट ः ३ लाख २१ हजार
१ सप्टेंबर ः ३ लाख १२ हजार
२ सप्टेंबर ः ३ लाख ०२ हजार
--------------------
(या ७ दिवसांचे मेट्रोचे एकूण उत्पन्न ३ कोटी १४ लाख रुपये)