दस्तनोंदणी कार्यालयांत गर्दी

पुणे, ता. ४ : सलग तीन दिवस सुट्ट्या आणि त्यानंतर सुरु होणाऱ्या पितृपंधरवड्यामुळे दस्त नोंदविण्यासाठी दुय्यम निबंधक कार्यालयांत गुरुवारी मोठी गर्दी झाली होती. त्यामुळे दस्तनोंदणीसाठी कार्यालयांची वेळ दीड तासांनी वाढविण्याची वेळ नोंदणी व मुद्रांक शुल्क विभागावर आली. परिणामी नागरिकांना गणेशोत्सवाचा मुहूर्तही साधता आला.

पुणे व पिंपरी-चिंचवड शहरात २७ दुय्यम निबंधक कार्यालये आहेत. यामध्ये दिवसाला सरासरी एक हजार २०० दस्त नोंदविले जातात. मात्र गुरुवारी दुपारपर्यंतच एक हजारांपेक्षा अधिक दस्त नोंदविले गेले असून रात्रीपर्यंत एक हजार ५०० दस्त नोंदविले गेल्याची माहिती नोंदणी व मुद्रांक विभागातील सह जिल्हानिबंधक संतोष हिंगाणे यांनी दिली.
ईद-ए-मिलादची शुक्रवारी (ता. ५) तर अनंत चतुर्दशीची शनिवारी (ता. ६) सुट्टी आहे. त्यानंतर रविवारी (ता.७) सार्वजनिक सुट्टी असल्यामुळे शासकीय कार्यालयांना सलग तीन दिवस सुट्टी आली आहे. तसेच सोमवारपासून (ता. ८) पितृपंधरवडा सुरु होत आहे. या काळात दस्तनोंदणी करण्यास अनेक नागरिक पुढे येत नाही. त्यामुळे त्यापूर्वीच व्यवहार पूर्ण करण्याची अनेकांची इच्छा असते. म्हणून गुरुवारी कार्यालयांत मोठ्या प्रमाणात गर्दी झाली होती.
दस्त नोंदविण्यासाठी नेहमीपेक्षा अधिक दस्त आल्याने हे दस्त सहा वाजेपर्यंत नोंदविणे शक्य होणार नाही. त्यामुळे दस्त नोंदणीसाठी आलेल्या नागरिकांची गैरसोय होऊ नये, म्हणून दुय्यम निंबधकांकडून वेळ वाढवून देण्याची मागणी दुपारीच सह जिल्हा निबंधक कार्यालयाकडे करण्यात आली. या मागणीनुसार सह जिल्हा निबंधकांनी दस्तनोंदणीसाठी दीड तासांचा अधिकवेळ वाढवून दिला. यामुळे नागरिकांची गैरसोय टळण्यास मदत झाली.