फरहा फाउंडेशनतर्फे शासनाचे आभार

पुणे, ता. ७ : महाराष्ट्र शासनाने मुंबई आणि मुंबई उपनगर विभागात ईद-ए-मिलादची सार्वजनिक सुट्टी ५ सप्टेंबरऐवजी ८ सप्टेंबरला आणि इतर सर्व जिल्ह्यांमध्ये ही सुट्टी आहे त्या दिवशीच ठेवावी, अशी मागणी पुण्यातील मिस फरहा चॅरिटेबल फाउंडेशनने मुख्यमंत्र्यांकडे केली होती. ही मागणी शासनाने मंजूर केल्‍याने फाउंडेशनचे अध्यक्ष डॉ. फरहा अन्वर हुसेन शेख व संचालक अन्वर शेख यांनी मुख्यमंत्री कार्यालय आणि सर्व संबंधित विभागांचे आभार मानले आहेत.
संस्थेने अधोरेखित केले होते, की या वर्षी ५ सप्टेंबरला अनंत चतुर्दशीचे गणेश विसर्जन आणि ईद-ए-मिलाद हे दोन्ही मोठे उत्सव एकाच दिवशी आल्याने वाहतूक कोंडी, कायदा-सुव्यवस्थेचा प्रश्‍न आणि नागरिकांच्या गैरसोयीची शक्यता निर्माण होऊ शकते. या पार्श्‍वभूमीवर ईद-ए-मिलादची सुट्टी ८ सप्टेंबरला द्यावी. हा निर्णय सामंजस्य, शांतता आणि नागरिकांच्या सोयीच्या दृष्टीने ऐतिहासिक पाऊल असल्याचे फाउंडेशनने नमूद केले.