पारपत्र कार्यालयाकडून बुधवारी संवाद सत्राचे आयोजन

पुणे, ता. ८ : प्रादेशिक पारपत्र कार्यालयाच्या वतीने ‘संवाद सत्राचे’ (ओपन हाउस) आयोजन केले आहे. हा कार्यक्रम बुधवारी (ता. १०) बाणेर येथील प्रादेशिक पारपत्र कार्यालयामध्ये दुपारी ३ ते ५ या वेळेत होणार आहे.
या सत्रात पारपत्र अर्जदारांना त्यांच्या अर्जासंबंधी शंका, अडचणी व तक्रारी मांडण्याची संधी मिळणार आहे. अर्जदारांना थेट प्रादेशिक पारपत्र अधिकाऱ्यांशी संवाद साधता येणार आहे. कार्यक्रमात सहभागी होऊ इच्छिणाऱ्या अर्जदारांना आगाऊ नोंदणीसाठी rpo.pune@mea.gov.in या ई-मेलवर आपली माहिती पाठवावी लागणार आहे. त्यात फाइल क्रमांक, पारपत्र क्रमांक (असल्यास), नाव आणि संक्षिप्त स्वरूपात आपला प्रश्‍न नमूद करणे आवश्यक आहे. प्रादेशिक पासपोर्ट कार्यालयाकडून अर्जदारांना मान्यतेचा ई-मेल पाठविण्यात येईल. फक्त ई-मेल दाखवूनच अर्जदारांना संवाद सत्रामध्ये प्रवेश दिला जाणार आहे. या सत्रासाठी नोंदणी सुरू झाल्याची माहिती प्रादेशिक पारपत्र कार्यालयाकडून देण्यात आली आहे.