पंडित भीमसेन जोश संगीत महोत्‍सव रंगणार लवकरच

पुणे, ता. ८ : ‘गुरुकुल कलाश्री संगीत मंडळ’ व ‘द औंध सोशल फाउंडेशन’ यांच्‍या वतीने १२व्‍या पं. भीमसेन जोशी संगीत महोत्‍सवाचे आयोजन केले आहे. औंधमधील पं. भीमसेन जोशी रंगमंदिरात १२ ते १४ सप्‍टेंबरदरम्‍यान हा सोहळा रंगणार असल्याची माहिती गुरुकुल कलाश्री संगीत मंडळाचे संस्‍थापक पंडित सुधाकर चव्‍हाण आणि फाउंडेशनचे अध्‍यक्ष अभिजित गायकवाड यांनी दिली. हा महोत्‍सव तीनही दिवस सायंकाळी ५ ते रात्री १० यादरम्‍यान रंगणार असून सर्वांसाठी विनामूल्य खुला आहे.
पंडित भीमसेन जोशी यांचे नातू व किराणा घराण्‍याचे गायक विराज जोशी यांच्‍या गायनाने महोत्‍सवाला सुरवात होईल. यानंतर प्रसिद्ध बासरीवादक पंडित प्रवीण घोडखिंडी यांचे बासरीवादन, दुसऱ्या दिवशी पं. सुधाकर चव्‍हाण यांचे गायन, पं. विजय घाटे यांचे तबलावादन, तिसऱ्या दिवशी कथक नृत्‍यांगना शर्वरी जमेनीस यांच्‍या सादरीकरणाने महोत्‍सवाचा समारोप होणार आहे.
पं. चव्‍हाण म्‍हणाले, ‘‘रसिकांना नवोदित कलाकारांसोबतच दिग्‍गज कलाकारांचे सादरीकरण अनुभवता यावे, या हेतूने या महोत्‍सवाचे आयोजन केले आहे. यात आयोजकांच्‍या वतीने देण्‍यात येणारा भारतरत्‍न पं. भीमसेन जोशी पुरस्‍कार यंदा बेळगावचे जागतिक कीर्तीचे बासरीवादक पं. राजेंद्र कुलकर्णी यांना जाहीर झाला असून, महोत्‍सवाच्‍या तिसऱ्या दिवशी त्‍यांना तो प्रदान करण्‍यात येणार आहे.’’