‘अप्सरा पेन्सिल्स’ची ‘डाली’ श्‍वान सदिच्छादूत

पुणे, ता. ८ : ‘हिंदुस्थान पेन्सिल्स’ कंपनीच्या ‘अप्सरा’ या ‘ब्रँड’ने एका श्‍वानाला आपली सदिच्छादूत (ब्रँड ॲम्बेसिडर) म्हणून घोषित केले आहे. ‘डाली’ ही लॅब्रेडॉर भारतातील पहिली रंगकाम करणारी श्‍वान म्हणून प्रसिद्ध आहे. ‘डाली’ अनाथ असून तिला लहानपणीच सोडून देण्यात आले होते. एका जोडप्याने तिला दत्तक घेतले. खेळाचा भाग म्हणून तोंडात रंगीत पेन व पेन्सिली धरून ती कागदावर रंगवू लागली. ‘अप्सरा’तर्फे ‘कनेक्ट ब्रश पेन्स’ (Konnect Brush Pens) हा उपक्रम सुरू करण्यात आला असून, त्यात डाली ‘अप्सरा’ ब्रँडची उत्पादने वापरून चित्रे काढणार आहे. तसेच चित्रप्रदर्शनांमध्ये मुले व पालकांना डालीला भेटता येणार आहे. तिच्यासह रंगकाम करण्याची संधीही मिळणार आहे. ‘हिंदुस्थान पेन्सिल्स’च्या विपणन विभाग प्रमुख ऐश्‍वर्या म्हणाल्या, ‘‘अनेक मुले आमची उत्पादने वापरूनच कागदावर पहिली-वहिल्या रेघोट्या आणि चित्रे काढतात. कल्पकता सगळ्यांसाठी असते असे आम्ही मानतो. त्या विचाराशी ‘डाली’ची सदिच्छादूत म्हणून निवड चपखल जुळते.’’
‘‘डालीने खेळ म्हणून चितारण्यास सुरवात केली, पण आता ते तिचे व्यक्त होण्याचे माध्यम झाले आहे. तिच्याकडे पाहून अनेकांना प्रेरणा मिळेल. कुटुंबांत कल्पकतेकडे सकारात्मकतेने पाहिले जाईल अशी आशा वाटते,’’ अशी भावना डालीच्या पालकांनी व्यक्त केली.
़‘हिंदुस्थान पेन्सिल्स प्रा. लि.’ ही भारतातील सर्वांत मोठी प्राथमिक शालेय साहित्य निर्माती कंपनी आहे. त्यांचे ‘अप्सरा’ व ‘नटराज’ हे पेन्सिलींचे ब्रँड्स प्रसिद्ध आहेत.
-------------