‘पीएमपी’ची धडक बसून खराडीतील तरुणीचा मृत्यू

पुणे, ता. ९ : भरधाव पीएमपी बसची धडक बसल्याने पादचारी तरुणीचा मृत्यू झाला. ही घटना पुणे रेल्वे स्थानक परिसरातील अलंकार चौकात रविवारी रात्री घडली. अपघातानंतर बसचालक घटनास्थळावरून पसार झाला असून त्याच्याविरुद्ध बंडगार्डन पोलिस ठाण्यात गुन्हा दाखल करण्यात आला आहे.
प्रीती विद्यासागर वेंगल (वय २६, रा. खराडी) असे मृत्यू झालेल्या तरुणीचे नाव आहे. याबाबत सुजित भंडारी (रा. मांजरी) यांनी बंडगार्डन पोलिस ठाण्यात फिर्याद दिली आहे. पोलिसांनी दिलेल्या माहितीनुसार, प्रीती वेंगल या अलंकार चौकात रस्ता ओलांडत होत्या. त्यावेळी ‘पीएमपी’ बसची तरुणीला जोराची धडक बसली. धडकेनंतर त्या बसच्या चाकाखाली चिरडल्याने मृत्यू झाला. अपघातानंतर बसचालक पसार झाला असून पोलिस त्याचा शोध घेत आहेत. पुढील तपास पोलिस उपनिरीक्षक गणेश चव्हाण करीत आहेत.