कर्करोगग्रस्त, अ‍ॅसिड हल्ल्यातील पीडितांसाठी फॅशन शोचे आयोजन

पुणे, ता. २९ ः देशातील अ‍ॅसिड हल्ल्यातील पीडितांमध्ये व कर्करोगाने ग्रस्त महिलांमध्ये आत्मविश्वास निर्माण व्हावा आणि समाजात त्यांची वेगळी ओळख निर्माण व्हावी, या हेतूने कुसुमवत्सल्य फाउंडेशनकडून फॅशन शोचे आयोजन करण्यात आले आहे. या फॅशन शोद्वारे या महिलांच्या दैनंदिन जीवनातील अडचणी, वेदना आणि संघर्ष यांच्याकडे समाजाचे लक्ष वेधण्याचा प्रयत्न करण्यात येणार असल्याचे माहिती फाउंडेशनच्या संस्थापिका वैशाली पाटील यांनी पत्रकार परिषदेत मंगळवारी (ता. २९) दिली.
हा फॅशन शो खानापूर येथे (ता. ५) फोर्ट व्ह्यू रिसॉर्ट येथे होणार आहे. शोसाठी विविध प्रकारचे गेटअप, मेकअप, ग्रुमिंग, फेस ऑफ ब्यूटी स्पर्धा आणि टॅलेंट राउंडचे आयोजन करण्यात आले आहे. या कार्यक्रमात महिलांना आत्मविश्वास मिळावा, यासाठी मार्गदर्शन केले जाणार आहे. कार्यक्रमात प्रमुख पाहुणे म्हणून विविध क्षेत्रांतील मान्यवर उपस्थित राहणार आहेत.
संस्थेच्या वैशाली पाटील म्हणाल्या, ‘‘प्रत्येक माणसाला हास्य आणि आशावाद भरलेले जीवन जगण्याचा हक्क आहे. अ‍ॅसिड हल्ल्याच्या आणि कर्करोग पीडित महिलांमध्येही स्वतःला सिद्ध करण्याची ताकद आहे. त्यांना समाजात आत्मविश्वासाने उभे राहता यावे, हा आमचा उद्देश आहे.’’