पथविक्रेता समितीच्या बैठकीची प्रक्रिया सुरू

पुणे, ता. २ : ‘नॅशनल असोसिएशन ऑफ स्ट्रीट वेंडर्स ऑफ इंडिया’, पथविक्रेता एकता समिती आणि स्थानिक संस्था- संघटनांच्या मागणीनंतर महापालिका प्रशासनाने नगर पथविक्रेता समितीची बैठक घेण्याच्या प्रक्रियेस सुरुवात केली आहे.
नगर पथविक्रेता समितीची स्थापना होऊन एक वर्षाचा कालावधी उलटूनही बैठक होत नसल्याने पथविक्रेत्यांच्या अनेक समस्या मार्गी लागत नव्हत्या. ज्यामध्ये पथविक्रेत्यांचे सर्वेक्षण, विक्री प्रमाणपत्र, अनधिकृतपणे कारवाया असे अनेक विषय प्रलंबित आहेत. या विषयांवर चर्चा करून ते पूर्णत्वास नेण्यासाठी समितीची बैठक होणे महत्त्वाचे आहे. अखेर बैठकीची प्रक्रिया सुरू केली आहे, असे समितीतर्फे सांगण्यात आले.