दोन्ही राष्ट्रवादी एकत्र आल्यास आश्‍चर्य नाही

पुणे, ता. ८ ः ‘‘राष्ट्रवादी काँग्रेस शरदचंद्र पवार पक्ष व राष्ट्रवादी काँग्रेस पक्ष एकत्र आल्यास आश्‍चर्य वाटण्याचे कारण नाही. त्याबाबतचा निर्णय सुप्रिया सुळे यांनी घ्यावा. दोन्हीकडील प्रतिनिधी हे एकाच विचारांचे आहेत. मात्र, मी आता या प्रक्रियेमध्ये नाही,’’ असे विधान राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी गुरुवारी पत्रकारांशी झालेल्या अनौपचारिक गप्पावेळी केले. यामुळे महाराष्ट्राच्या राजकीय पटलावर दोन्ही राष्ट्रवादीच्या एकत्रीकरणाची जोरदार चर्चा सुरू झाली आहे.
पवार यांनी गुरुवारी मोदीबाग येथील निवासस्थानी माध्यमांशी अनौपचारिक गप्पा मारल्या. त्यावेळी ‘तुमच्या पक्षाचे भविष्य तुम्हाला कसे दिसते?’, असा प्रश्‍न त्यांना विचारण्यात आला. त्यास उत्तर देताना पवार म्हणाले, ‘‘आमच्या पक्षात दोन मतप्रवाह आहेत. एका गटाला वाटते की अजित पवार यांच्या नेतृत्वाखालील राष्ट्रवादी काँग्रेससोबत एकत्र यावे, तर दुसऱ्या गटाला वाटते आम्ही थेट किंवा अप्रत्यक्षपणे भाजपसोबत जाऊ नये. इंडिया आघाडीत सहभागी होऊन आघाडीची पुनर्रचना करावी. मात्र, इंडिया आघाडी आज सक्रिय नाही. म्हणून आम्हाला पक्षाची पुनर्रचना, पुनर्बांधणी करून तरुणांना संधी द्यावी लागेल.’’

शरद पवार म्हणाले...
- पक्ष चालवायचा आहे. त्यामुळे निर्णय सुप्रिया सुळे यांनी घ्यायचा आहे. त्यांना पूर्णपणे स्वातंत्र्य दिलेले आहे
- दिल्लीतील खासदार एकाच विचारांचे
- भविष्यात काय निर्णय घ्यायचा हे सुळे, जयंत पाटील हेच ठरवतील
- सुळे, अमोल कोल्हे यांचीही चर्चा सुरू
- एकनाथ शिंदे यांच्यासमवेत काही लोक गेले आहेत, तेही येतील
- मी पक्षाच्या निर्णयप्रक्रियेपासून आता लांब
- सुप्रिया सुळे, अजित पवार यांना भविष्यात निवडणुका लढवायच्या आहेत. त्यामुळे त्यांनी एकत्र बसून निर्णय घ्यायचा आहे