रस्ता सुरक्षेबाबत शिवाजीनगरमध्ये जागृती

पुणे, ता. ९ : शहरातील वाढते वाहतूक प्रमाण, बेशिस्त वाहनचालक आणि त्यामुळे होणाऱ्या अपघातांची गंभीर दखल घेत पुणे शहर वाहतूक विभाग आणि पुणे सोशल ग्रुप यांच्यातर्फे शिवाजीनगर येथील शिमला ऑफिस चौक येथे ‘रस्ता सुरक्षा अभियान’ कार्यक्रम नुकताच घेण्यात आला. या अभियानाचा मुख्य उद्देश नागरिकांमध्ये वाहतुकीचे नियम पाळण्याची जाणीव निर्माण करणे आणि सुरक्षित वाहतुकीस प्रोत्साहन देणे हा होता. यावेळी हातात फलक घेऊन संदेश देणे, वाहनचालकांशी थेट संवाद साधणे अशा विविध मार्गाने जनजागृती करण्यात आली. याप्रसंगी अतिरिक्त पोलिस आयुक्त मनोज पाटील, पोलिस उपायुक्त (वाहतूक विभाग) अमोल झेंडे, आयएनएस वृत्तवाहिनीचे प्रतिनिधी राकेश छाजेड, वरिष्ठ पोलिस निरीक्षक महेश बालकोटगी, रोटरी क्लब ऑफ कल्याणीनगर पुणेच्या नीता कौल, पोलिस मित्र संघटनेचे राजेंद्र कपोते आदी उपस्थित होते.