संयुक्त पूर्व परीक्षेचा निकाल रखडला

प्रज्वल रामटेके : सकाळ वृत्तसेवा

पुणे, ता. ९ : महाराष्ट्र लोकसेवा आयोगामार्फत (एमपीएससी) घेण्यात आलेल्या ‘महाराष्ट्र गट-ब (अराजपत्रित) सेवा संयुक्त पूर्व परीक्षा-२०२४’चा (संयुक्त पूर्व परीक्षा) निकाल अद्याप जाहीर झालेला नाही. परीक्षेला तब्बल दोन महिने उलटून गेले असतानाही निकालाबाबत कोणतीही अधिकृत घोषणा न झाल्याने विद्यार्थ्यांमध्ये संभ्रम आणि नाराजीचे वातावरण आहे.
संयुक्त पूर्व परीक्षेअंतर्गत सहायक कक्ष अधिकारी (५४ पदे), राज्य कर निरीक्षक (२०९ पदे) आणि पोलिस उपनिरीक्षक (२१६ पदे) अशा एकूण ४७९ पदांसाठी ही भरती प्रक्रिया राबवली जात आहे. ऑक्टोबर २०२४ मध्ये या परीक्षेची जाहिरात प्रसिद्ध झाली होती. त्यानंतर ही परीक्षा मूलतः ५ जानेवारी २०२५ रोजी होण्याचे निश्चित करण्यात आले होते. मात्र, काही कारणास्तव ती पुढे ढकलून २ फेब्रुवारी रोजी घेण्यात आली. परीक्षा झाल्याचे तीन दिवसानंतर पाच फेब्रुवारीला पहिली उत्तरतालिका, तर ४ मार्चला दुसरी उत्तरतालिका जाहीर करण्यात आली.
या घडामोडींनंतर साधारणतः एका महिन्याच्या आत निकाल लागणे अपेक्षित असते. मात्र, चार एप्रिल ते चार मे अशा दोन महिन्याचा कालावधी उलटून गेला तरी अद्याप निकाल जाहीर करण्यात आला नाही. त्यामुळे संयुक्त पूर्व परीक्षेचा निकाल लवकरात लवकर जाहीर करावा, अशी मागणी विद्यार्थ्यांनी केली आहे. यासंदर्भात महाराष्ट्र लोकसेवा आयोगाच्या सचिव डॉ. सुवर्णा खरात यांच्याशी दूरध्वनीद्वारे संपर्क साधण्याचा प्रयत्न केला असता, त्यांनी प्रतिसाद दिला नाही.
याविषयी विद्यार्थ्यांशी संवाद साधला असता नाव प्रसिद्ध न करण्याच्या अटीवर त्यांनी सांगितले की, ‘‘आयोगाचा हा निष्काळजीपणा आता असह्य झाला आहे. परीक्षा घेण्यात, उत्तरतालिका प्रसिद्ध करण्यात आणि आता निकाल लागण्यातही उशीरच होत आहे. आम्ही अनेक महत्त्वाचे दिवस या परीक्षेसाठी दिले आहेत. निकालासाठी इतकी प्रतीक्षा करावी लागणे हा विद्यार्थ्यांवर अन्याय आहे. आयोगाने तत्काळ परिपत्रकाद्वारे स्पष्टीकरण द्यावे आणि शक्य तितक्या लवकर निकाल जाहीर करावा ही आमची नम्र विनंती.’’

‘पीएसआय’च्या तीन हजार जागा रिक्त
संयुक्त पूर्व परीक्षेतील पोलिस उपनिरीक्षक पदासाठी राज्यातील सुमारे तीन ते चार लाख विद्यार्थी अर्ज करतात. परीक्षा देणाऱ्या विद्यार्थ्यांच्या तुलनेने आलेल्या जाहिरातीमध्ये पदांची संख्या खूप कमी आहे. त्यामुळे राज्य सरकार विद्यार्थ्यांवर अन्याय करत आहे, अशी भावना विद्यार्थ्यांद्वारे व्यक्त करण्यात येत आहे. राज्यात पोलिस विभागात मोठ्या प्रमाणात रिक्त पदे आहेत. त्यात पोलिस उपनिरीक्षक पदांच्या जागा दोन हजार ९५१ जागा रिक्त असताना राज्य लोकसेवा आयोगाच्या संयुक्त पूर्व परीक्षेच्या जाहिरातीमध्ये पोलिस उपनिरीक्षकांची फक्त २१६ पदे आहेत. त्यामुळे पोलिस उपनिरीक्षक पदांच्या जागांमध्ये वाढ करावी, अशी मागणी विद्यार्थ्यांनी केली आहे.

संयुक्त पूर्व परीक्षेच्या निकालाला होत असलेल्या विलंबामुळे विद्यार्थ्यांमध्ये संभ्रमाची स्थिती निर्माण झाली आहे. दुसरी उत्तरतालिका चार मार्चला प्रसिद्ध झाली. त्यानंतर दोन महिने उलटून गेले तरी अद्याप निकाल जाहीर झालेला नाही. आयोगाने निकाल का लावलेला नाही याचे स्पष्टीकरण परिपत्रकाद्वारे द्यावे किंवा तत्काळ निकाल जाहीर करावा.
-एक विद्यार्थी

गट-क पूर्व परीक्षा एक जून रोजी होणार असल्याचे जाहीर करण्यात आले आहे. त्यामुळे संयुक्त गट-ब मुख्य परीक्षेचा अभ्यास सुरू ठेवायचा की गट-क पूर्व परीक्षेवर लक्ष केंद्रित करायचे, अशा द्विधा मनःस्थितीत अभ्यास सुरू आहे. दोन्ही परीक्षांच्या तयारीसाठी वेळ कमी आहे. गट-ब चा निकाल लावल्याशिवाय दिशा ठरत नाहीये. निकाल सकारात्मक लागला, तर ‘गट-क’कडे दुर्लक्ष होईल, आणि नकारात्मक असेल तर ‘गट-ब’साठी घेतलेली मेहनत वाया जाणार. आयोगाने ही अनिश्चितता दूर करून तातडीने निकाल जाहीर करावा, ही विनंती आहे.
-एक विद्यार्थी