पुण्यात चार दिवस ‘येलो’ अलर्ट

पुणे, ता. १२ : शहरात मागील दोन दिवसांपासून सुरू असलेल्या पावसामुळे पुणेकरांना उन्हाच्या झळांपासून काहीसा दिलासा मिळाला आहे, तर पुढील चार दिवसांत कमाल तापमानामध्ये किंचित घट होणार असून मेघगर्जना, विजांचा कडकडाट आणि वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता आहे. त्यामुळे पुणे शहराला पुढील चार दिवस ‘यलो’ अलर्ट देण्यात आला आहे.
शहरात शुक्रवारी आणि शनिवारी झालेल्या पावसामुळे कमाल तापमानात किंचित घट झाली असून उन्हाच्या तीव्रतेत लक्षणीय घट जाणवली आहे. पुढील दोन दिवसांत तापमानात आणखी घसरण होण्याची शक्यता आहे. त्यामुळे उन्हाचा तडाखा काहीसा कमी राहण्याची शक्यता आहे. मॉन्सूनपूर्व हवामानातील बदल, चक्रीय स्थिती आणि वातावरणातील आर्द्रतेमुळे शहरात मेघगर्जना, विजांचा कडकडाट आणि वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता भारतीय हवामानशास्त्र विभागाने वर्तविली आहे. सोमवारी (ता. १२) शहरामध्ये कमाल तापमानामध्ये किंचित वाढ होऊन कमाल तापमान ३६ अंश सेल्सिअस नोंदविण्यात आले, तर किमान तापमान २४ अंश सेल्सिअस नोंदविण्यात आले. शहरात शनिवारी दिवसभर ढगाळ वातावरण होते. त्यामुळे हवेत जाणवणारा गारवा उकाड्यापासून दिलासा देणारा ठरला.

असा आहे अंदाज
- पुणे आणि परिसरात मंगळवारी (ता. १३) कमाल तापमानात किंचित घट होणार असून कमाल तापमान ३५ अंश सेल्सिअस इतके नोंदविले जाईल
- किमान तापमान २४ अंश सेल्सिअस नोंदवले जाईल
- आकाश अंशतः ढगाळ राहण्याची शक्यता
- मेघगर्जना, विजांचा कडकडाट आणि ताशी ३० ते ४० किलोमीटर वेगाने वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता
- गुरुवारी (ता. १५) कमाल तापमानात घट होऊन कमाल तापमान ३४ अंश सेल्सिअस नोंदविण्यात येणार
- आकाश अंशतः ढगाळ राहण्याची शक्यता