चांगल्या परताव्याच्या आमिषाने दापंत्याची दोन कोटींची फसवणूक

पुणे, ता. ५ ः शेअर बाजारात गुंतवणूक केल्यास चांगला परतावा मिळेल, असे आमिष दाखवत दांपत्याची दोन कोटी ३८ लाख ५० हजार रुपयांची फसवणूक केल्याचा प्रकार उघडकीस आला आहे. फसवणूक केल्याप्रकरणी एका खासगी कंपनीच्या संचालकांविरुद्ध शिवाजीनगर पोलिसांनी गुन्हा दाखल केला.

या प्रकरणी इन्फिनाइट बेकॉन इंडिया प्रायव्हेट लिमिटेड व ट्रेड्स इन्व्हेस्टमेंट प्रायव्हेट लिमिटेड या कंपन्यांचे संचालक नवनाथ अवताडे, अगस्त राहुल मिश्रा, राहुल श्यामराव काळोखे, सचिन लक्ष्मण खडतरे, चेतन धर, प्रसाद प्रकाशराव कुलकर्णी, ययाती राहुल मिश्रा आणि गौरव देविदास सुखदेवे यांच्यावर गुन्हा दाखल करण्यात आला आहे. याबाबत एकाने शिवाजीनगर पोलिस ठाण्यात फिर्याद दिली आहे.

तक्रारदार आणि त्यांच्या पत्नीने कंपनीत गुंतवणूक केली होती. कंपनीच्या संचालकांनी गुंतवणुकीवर दरमहा सहा ते आठ टक्के परतावा देण्याचे आमिष दाखविले होते. तक्रारदाराला आरोपींनी एक ॲप मोबाइलमध्ये घेण्यास सांगितले. सुरुवातीला या ॲपच्या माध्यमातून गुंतवणुकीवर परतावा मिळाल्याचे भासविण्यात आले. तक्रारदाराने गुंतवणूक केलेली रक्कम आणि परतावा बँक खात्यात जमा करण्यास सांगितले. आरोपींनी त्यांना मुद्दल, तसेच परतावा दिला नाही. फसवणूक झाल्याचे तक्रारदाराने पोलिसांकडे तक्रार दिली.