भोसरीत महावितरणकडून १९ लाखांची वीजचोरी उघड

पुणे, ता. ५ : भोसरी ‘एमआयडीसी’मध्ये गेल्या दोन वर्षांपासून एका औद्योगिक ग्राहकाकडून रिमोटचा वापर करून केली जाणारी वीजचोरी ‘महावितरण’ने नुकतीच उघडकीस आणली. या ग्राहकाकडून १९ लाख १९ हजारांचा दंड वसूल करण्याबरोबरच वीजचोरीसाठी वापरले जाणारे साहित्यही ‘महावितरण’कडून जप्त करण्यात आले आहे.

‘महावितरण’कडून वीजचोरी विरोधात मोहीम हाती घेण्यात आली आहे. त्यासाठी खास पथक तयार करण्यात आले आहे. अतिरिक्त कार्यकारी अभियंता यांच्या नेतृत्वाखाली सहाय्यक अभियंता गजानन झापे, वीज कर्मचारी हर्षद लोखंडे, सोमनाथ गायकवाड, महेश वाघमारे यांनी भोसरी ‘एमआयडीसी’मध्ये तपासणी केली असता मे. गणेश प्रेसिंग या औद्योगिक ग्राहकाकडून रिमोटद्वारे वीजचोरी केली जात असल्याचे आढळून आले. वीजचोरीसाठी वापरलेले सर्व साहित्य महावितरणने जप्त केले आहे, तसेच या ग्राहकाला मागील दोन वर्षांमध्ये केलेल्या ७७ हजार २७० युनिटच्या वीजचोरी पोटी १९ लाख १९ हजार ३६२ रुपयांचा दंड व २ लाख ३० हजारांचे तडजोड आकाराचे देयक देत दंड वसूल करण्यात आला आहे.