मुख्यमंत्री सहाय्यता निधीतून बाधित कुटुंबीयांना आर्थिक मदत

पुणे, ता. ५ : नैसर्गिक आपत्ती, अपघात, दंगे आदींमुळे बाधित झालेल्या कुटुंबीयांना तातडीची मदत मिळावी, यासाठी राज्य सरकारच्या मुख्यमंत्री सहाय्यता निधीतून आर्थिक मदत दिली जाते. जानेवारी ते जुलै या कालावधीत अशा विविध घटनांमध्ये मृत्युमुखी पडलेल्या किंवा गंभीर जखमी झालेल्या व्यक्तींच्या कुटुंबीयांना पुणे जिल्ह्यात १ कोटी ३१ लाख रुपयांची मदत करण्यात आली आहे.
खेड तालुक्यातील राजगुरू येथे दोन अल्पवयीन बहिणींवर अत्याचार करून हत्या केली होती. ही घटना डिसेंबर २०२४ मध्ये घडली होती. या प्रकरणात मुख्यमंत्री सहाय्यता निधीतून मुलींच्या कुटुंबीयांना १० लाखांची मदत करण्यात आली आहे. पुणे-नाशिक महामार्गावर १७ जानेवारी रोजी नारायणगाव येथे झालेल्या अपघात १० जणांचा मृत्यू झाला होता. या प्रकरणात मृतांच्या कुटुंबीयांना प्रत्येकी ५ लाख रुपये मदत करण्यात आली आहे, तर खराडी येथे आगीत एकाचा मृत्यू झाला होता. या घटनेतील पंडितांच्या कुटुंबीयांना १ लाख रुपयांची मदत मुख्यमंत्री सहाय्यता निधीतून देण्यात आली आहे. पहलगामच्या आतंकवादी हल्ल्यात दोघांचा मृत्यू झाला. त्यांच्या कुटुंबीयांना प्रत्येकी अडीच लाखांची मदत करण्यात आली आहे, तसेच मावळ तालुक्यातील कुंडमळा पूल पडून झालेल्या दुर्घटनेत ४ जणांचा मृत्यू, तर सुमारे पन्नास जास्त जण जखमी झाले होते. या दुर्घटनेत मृत्यू पावलेल्यांच्या कुटुंबीयांना प्रत्येकी ५ लाख, तर जखमींना मुख्यमंत्री सहाय्यता निधीतून मदत करण्यात आली.
अशा प्रकारे मागील सात महिन्यांच्या काळात अपघात, आतंकवादी हल्ल्यात मृत्युमुखी पडलेल्या, तसेच जखमी व्यक्तींच्या कुटुंबीयांना मुख्यमंत्री सहाय्यता निधीतून १ कोटी ३१ लाखांची मदत करण्यात आली आहे.
-------------