वेळेच्या नियोजनाने व्यक्तिमत्त्व समृद्ध

पुणे, ता. ५ : ‘‘तुमचे काम कितीही व्यग्र असो, दिवसातील किमान एक तास स्वतःसाठी द्या. ते शक्य नसेल, तर तुमच्या वेळेचे नियोजनच चुकीचे आहे. आपला प्राधान्यक्रम ठरवून वेळेचे योग्य नियोजन केल्यास व्यक्तिमत्त्व अधिक समृद्ध आणि शिस्तबद्ध होते,’’ असे स्पष्ट मत ‘सकाळ’ समूहाचे अध्यक्ष प्रतापराव पवार यांनी मांडले.

विद्यार्थी सहाय्यक समितीचे कार्यकारी विश्वस्त तुषार रंजनकर आणि माजी विद्यार्थी नवनाथ जगताप लिखित, रुद्र प्रकाशनातर्फे प्रकाशित ‘मोबाईल व्यसनमुक्ती’ या पुस्तकाचे प्रकाशन मंगळवारी ‘सकाळ’चे अध्यक्ष प्रतापराव पवार आणि लेखक अच्युत गोडबोले यांच्या हस्ते झाले, याप्रसंगी पवार बोलत होते. समितीचे विश्वस्त डॉ. भाऊसाहेब जाधव, सी. ई. पोतनीस, सामाजिक कार्यकर्ते यजुर्वेंद्र महाजन, प्रदीप गारटकर आदी उपस्थित होते.
पवार म्हणाले, ‘‘मोबाईल आणि डिजिटल माध्यमांचा गरजेपुरता वापर करा. उर्वरित वेळ वैयक्तिक विकासासाठी द्या. तुमचे भवितव्य तुमच्या वेळेच्या वापरावर ठरणार आहे. इतरांशी तुलना करण्याऐवजी स्वतःची ओळख स्वतः तयार करा. सबबी सांगण्याऐवजी स्वयंशिस्त आणि इच्छाशक्ती महत्त्वाची आहे.’’
गोडबोले म्हणाले, ‘‘मोबाईल हे मूलतः संवादाचे माध्यम होते. मात्र, तंत्रज्ञानाच्या प्रगतीमुळे त्यातील संवाद हरपून अन्य गोष्टी मानवी मेंदूला वेडे करू पाहत आहेत. मोबाईलचा गरजेपुरता वापर केला, तर आपल्या जगण्याला पूरक असे साधन आहे. मात्र, त्याचा अतिवापर माणसाला अधोगतीकडे घेऊन जाणारा आहे.’’
महाजन यांनी मोबाईलचा वापर अनेकांना फायद्याचा ठरतो, असे सांगत नात्यांमध्ये दुरावा निर्माण होण्याचे कारणही मोबाईलच असल्याचे सांगितले. रंजनकर यांनी मोबाईल, इंटरनेटच्या विळख्यातून समाजाला बाहेर काढण्याची गरज अधोरेखित केली. मेंदूवर थेट परिणाम करणाऱ्या मोबाईलच्या व्यसनाला आपण गांभीर्याने घ्यायला हवे, असे नवनाथ जगताप यांनी नमूद केले. सुप्रिया केळवकर यांनी प्रास्ताविक केले. पर्णवी म्हस्के यांनी सूत्रसंचालन केले.