मोटारीची धडक बसून दुचाकीस्वाराचा मृत्यू

पुणे, ता. ५ : कोरेगाव पार्क भागात भरधाव मोटारीची धडक बसून दुचाकीस्वार तरुणाचा मृत्यू झाला. या अपघातात दुचाकीवरील सहप्रवासी तरुणी जखमी झाली. या प्रकरणी पोलिसांनी मोटारचालकावर गुन्हा दाखल केला आहे.
अजिंक्य राजू गायकवाड (वय २१, रा. लक्ष्मीनगर, येरवडा) असे मृत्युमुखी पडलेल्याचे नाव आहे. अपघातात अनुष्का राजू गायकवाड ही गंभीर जखमी झाली. याबाबत अजिंक्यचे वडील राजू यांनी येरवडा पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, मोटारचालक आकाश गायकवाड (वय २५, रा. शाहू मोडक उद्यानाजवळ, कोरेगाव पार्क) याच्यावर गुन्हा दाखल केला आहे.
पोलिसांनी दिलेल्या माहितीनुसार, दुचाकीस्वार अजिंक्य आणि त्याची बहीण अनुष्का चार ऑगस्टला रात्री कोरेगाव पार्क भागातील ब्ल्यू डायमंड हॉटेल चौकातून निघाले होते. त्यावेळी मोटारीने दुचाकीस्वार अजिंक्य आणि सहप्रवासी अनुष्का यांना धडक दिली. या अपघातात अजिंक्य आणि अनुष्का जखमी झाले. गंभीर जखमी झालेल्या अजिंक्यचा उपचारादरम्यान मृत्यू झाला. या प्रकरणी मोटारचालक आकाश गायकवाडला अटक केली आहे. सहायक पोलिस निरीक्षक राजेंद्र गायकवाड तपास करत आहेत.

दुभाजकावर आदळून
दुचाकीस्वाराचा मृत्यू
भरधाव दुचाकी दुभाजकावर आदळून दुचाकीस्वाराचा मृत्यू झाल्याची घटना कोंढवा भागात घडली. समीर ऐजाज शेख (वय ४८, रा. जे. के. पार्क, कोंढवा खुर्द) असे मृत्युमुखी पडलेल्याचे नाव आहे. याबाबत पोलिस उपनिरीक्षक रवींद्र गावडे यांनी कोंढवा पोलिस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार समीर शेख हे एक ऑगस्टला दुपारी बाराच्या सुमारास कोंढव्यातील सोमजी चौकातून निघाले होते. त्या वेळी भरधाव दुचाकीवरील नियंत्रण सुटले आणि दुचाकीस्वार समीर हे दुभाजकावर आदळले.