भिडे वाडा स्मारकाच्या कामासाठी वाहतूक रात्री बंद

पुणे, ता. ५ : छत्रपती शिवाजी महाराज रस्त्यावरील भिडे वाडा स्मारकाच्या बांधकामासाठी हुतात्मा चौकातून स्वारगेटकडे जाणाऱ्या वाहतूक व्यवस्थेत बदल करण्यात येणार आहे. या भागातील वाहतूक बदल २५ ऑगस्टपर्यंत लागू राहणार आहेत. तर दररोज रात्री दहा ते सकाळी सहापर्यंत या भागातून जाणारी वाहतूक पर्यायी मार्गाने वळविणार आहे.
छत्रपती शिवाजी महाराज रस्त्यावर भिडे वाडा स्मारकाचे काम सुरू केले आहे. बांधकाम साहित्य वाहतूक करणारी वाहने, अवजड क्रेन कामानिमित्त ये-जा करणार आहेत. हे काम दररोज रात्री दहानंतर करणार आहे. त्यामुळे गाडगीळ पुतळामार्गे छत्रपती शिवाजी महाराज रस्त्यावरून स्वारगेटकडे जाणारी वाहतूक वळविण्यात येणार आहे. वाहतूक बदलाची अंमलबजावणी सुरू केली असल्याची माहिती वाहतूक शाखेचे पोलिस उपायुक्त हिंमत जाधव यांनी दिली.

असे आहेत बदल
छत्रपती शिवाजी महाराज रस्त्यावरील स. गो. बर्वे चौकातून (मॉडर्न कॅफे) स्वारगेटकडे जाणाऱ्या सर्व प्रकारच्या वाहनांनी जंगली महाराज रस्ता, डेक्कन जिमखाना, खंडोजीबाबा चौक, टिळक रस्तामार्गे इच्छितस्थळी जावे. अप्पा बळवंत चौकातून हुतात्मा चौकमार्गे बेलबाग चौक, स्वारगेटकडे जाणाऱ्या वाहनांनी श्रीकृष्ण चित्रपटगृह रस्त्याने लक्ष्मी रस्त्यावर यावे. बेलबाग चौकातून इच्छितस्थळी जावे, असे आवाहन पोलिसांनी केले आहे.