वीजबिल ‘पीडीएफ’साठी करा लॉगिंन

पुणे, ता. ६ : सायबर सुरक्षितता तसेच वीजग्राहक माहितीच्या गोपनीयतेसाठी महावितरणच्या लघुदाब वर्गवारीच्या वीजबिलाची ‘पीडीएफ’ प्रत अधिकृत संकेतस्थळावरून ऑनलाइन डाऊनलोड करण्यासाठी आता संबंधित ग्राहकांना नोंदणीकृत प्रवेश (लॉगिन) करणे अनिवार्य करण्यात आले आहे. केंद्र सरकारच्या सायबर सुरक्षेच्या मार्गदर्शक तत्त्वानुसार हा बदल महावितरणकडून करण्यात आला आहे.
महावितरणच्या www.mahadiscom.in या अधिकृत संकेतस्थळावरील ‘वीजदेयक अवलोकन/भरणा’ (View/Pay Bill) पेजवर लघुदाब वर्गवारीतील घरगुती, व्यावसायिक, औद्योगिक व इतर ग्राहकांना चालू महिन्याच्या वीजबिलाची ‘पीडीएफ’ प्रत ऑनलाइन डाउनलोड करण्याची सोय उपलब्ध करून देण्यात आली आहे. मात्र, याआधी केवळ १२ अंकी ग्राहक क्रमांक सबमीट करून वीजबिल डाउनलोड करण्याची सोय उपलब्ध होती. मात्र, महावितरणच्या वीजबिलाची थकबाकी असल्याचे सांगत ऑनलाइन फसवणूक करण्याचे प्रकार वाढीस लागले आहेत. त्या पार्श्‍वभूमीवर ग्राहकांची होणारी फसवणूक टाळण्यासाठी ही सुविधा उपलब्ध करून देण्यात आली आहे. आता नव्या बदलात वीजबिल लॉगिनशिवाय ऑनलाइन भरण्याचा पर्याय खुला ठेवण्यात आला आहे. मात्र ‘पीडीएफ’ वीजबिल डाउनलोड करण्यासाठी लॉगिन करणे अनिवार्य आहे. लॉगिनची लिंकदेखील ‘वीजदेयक अवलोकन/भरणा’ पेजवर उपलब्ध करून देण्यात आली आहे. तसेच ज्या ग्राहकांनी आतापर्यंत लॉगिनसाठी नोंदणी केलेली नाही, त्यांनी ग्राहक क्रमांक, भ्रमणध्वनी क्रमांक तसेच ई-मेल (असल्यास) माहिती भरून नोंदणी करणे, तसेच लॉगिन आयडी व पासवर्ड (परवली शब्द) निश्चित करणे आवश्यक आहे. त्यासाठीदेखील लिंक त्याच ठिकाणी उपलब्ध असणार आहे, असे महावितरणकडून सांगण्यात आले.
लॉगिन केल्यानंतर स्वतःच्या एकापेक्षा अधिक वीजजोडण्यांसाठी विविध ऑनलाइन सेवा उपलब्ध आहे. या सुविधेचा लाभ घेण्यासाठी लॉगिन केल्यानंतर १२ अंकी ग्राहक क्रमांक लक्षात ठेवण्याची आवश्यकता नाही. तसेच वीज बिलावरील नाव, वीज भार बदलणे, तक्रार करणे किंवा तक्रारीची सद्यःस्थिती पाहणे, वीज बिलांचा भरणा, पत्ता बदलणे व इतर सर्व ऑनलाइन सेवांचा वीज ग्राहकांना लाभ घेता येणार आहे, असेही महावितरणकडून सांगण्यात आले.