वडिलांकडून मुलासाठी तीस लाखांची पोटगी

पुणे, ता. ६ ः कौटुंबिक वादात पत्नी स्वतःच्या उदरनिर्वाहासाठी पोटगी मागत असल्याचे अनेक प्रकरणांत घडले आहे. मात्र, येथील कौटुंबिक न्यायालयात दाखल असलेल्या घटस्फोटाच्या एका प्रकरणात पत्नीने स्वतःसाठी काही न मागता आपल्या मुलाच्या भविष्यासाठी पतीकडे न्यायालयात मदतीचा हात मागितला. त्यावर पित्याने मुलासाठी सकारात्मक विचार करत ३० लाख रुपयांची पोटगी दिली.
हा दावा होता सुरेश आणि सुरेखा (नावे बदललेली) या जोडप्याचा. सुरेश हे अभियंता असून, सुरेखा शिक्षिका आहे. २०१८ मध्ये त्याचे लग्न झाले होते व त्यांना एक मुलगा आहे. वैवाहिक आयुष्य सुरळीत असताना काही दिवसांनी त्यांच्यात वैचारिक मतभेद होऊ लागले. कौटुंबिक आयुष्यात विचारांचा विसंवाद निर्माण झाल्याने २०१९ पासून हे जोडपे विभक्त झाले. त्यानंतर पती सुरेश यांनी घटस्फोटासाठी अर्ज दाखल केला. न्यायालयात सुरेखा यांनी स्वतःसाठी काहीही मागितले नाही. मात्र, आपल्या मुलाच्या शिक्षणासाठी आणि त्याच्या पुढील आयुष्यासाठी पोटगी मिळावी, अशी मागणी केली.
पत्नीच्या मागणीला सुरेश यांनी सकारात्मक प्रतिसाद दिला आणि मुलासाठी एकरकमी ३० लाख रुपये देण्याचे मान्य केले. याखेरीज, दोघांनी परस्पर संमतीने मुलाचा ताबा आईकडे राहील, असा निर्णय घेतला. ही सर्व प्रक्रिया ‘राष्ट्रासाठी मध्यस्थी’ या उपक्रमाअंतर्गत पार पडली. कौटुंबिक न्यायालयाच्या न्यायाधीश जी. जी. वायाळ यांनी हे प्रकरण अ‍ॅड. राणी कांबळे-सोनावणे यांच्याकडे मध्यस्थीसाठी पाठवले होते. पतीच्या बाजूने अ‍ॅड. जान्हवी देशपांडे-अधिकारी आणि अ‍ॅड. ऋतुजा खिंवसरा यांनी काम पाहिले. मध्यस्थीच्या प्रक्रियेमुळे तडजोड झाली, अन् एकतर्फी सुरू असलेला घटस्फोटाचा दावा परस्पर सहमतीने निकाली काढण्यात आला.