उसने पैसे परत न केल्याने धनकवडीत मारहाण

पुणे, ता. ६ ः उसने घेतलेले पैसे परत न केल्याने टोळक्याने दहशत माजवून महिला, तसेच तिच्या पतीला जिवे मारण्याची धमकी दिल्याची घटना धनकवडीत घडली. या प्रकरणी सहकारनगर पोलिसांनी दोघांना अटक केली आहे. आरोपींबरोबर असलेल्या अल्पवयीन मुलांवर गुन्हा दाखल करण्यात आला आहे.
याबाबत एका महिलेने सहकारनगर पोलिस ठाण्यात फिर्याद दिली आहे. या प्रकरणी रोहन सचिन यादव (वय २२, रा. महालक्ष्मी अपार्टमेंट, धनकवडी), अंगद अशोक साठे (वय २०, रा. आंबेगाव पठार, धनकवडी) यांना अटक करण्यात आली. त्यांच्याबरोबर असलेल्या साथीदारांसह चार अल्पवयीनांवर पोलिसांनी गुन्हा दाखल केला आहे. पोलिसांनी दिलेल्या माहितीनुसार, तक्रारदार महिला धनकवडीतील शंकर महाराज वसाहतीत राहायला आहे. महिलेच्या पतीने उसने घेतलेल्या पैशांवरून आरोपींशी वाद झाला होता. त्यानंतर सोमवारी (ता. ४) पहाटे चारच्या सुमारास आरोपी यादव, साठे आणि साथीदार हे कोयते घेऊन शंकर महाराज वसाहतीत आले. आरोपींनी दहशत माजवून महिला, तसेच तिच्या पतीला शिवीगाळ केली. दहशत माजवून पसार झालेल्या दोघांना अटक करण्यात आली. सहायक पोलिस निरीक्षक सागर पाटील या गुन्ह्याचा तपास करत आहेत.