महिला सशक्तीकरण, सबलीकरण कार्यशाळा

पुणे, ता. ७ : ‘अभामशि’ परिषदेचे यशवंतराव चव्हाण विधी महाविद्यालय आणि सावित्रीबाई फुले पुणे विद्यापीठ यांच्यातर्फे गुणवत्ता सुधार योजनेंतर्गत आयोजित ‘महिला सशक्तीकरण व सबलीकरण कार्यशाळा’ नुकतीच झाली. उद्‍घाटन महाविद्यालयाच्या प्राचार्या डॉ. शुभदा घोलप यांच्या हस्ते झाले. त्यांनी महिलांचा सर्वांगीण विकास हा राष्ट्रनिर्मितीचा पाया असल्याचे सांगत शैक्षणिक व शासकीय उपक्रमांच्या माध्यमातून महिलांना सक्षम करण्याचे महत्त्व अधोरेखित केले.
कार्यशाळेच्या पहिल्या सत्रात डॉ. फाल्गुनी जपे यांनी महिलांच्या शारीरिक आणि मानसिक आरोग्यावर सखोल मार्गदर्शन केले. तरुण स्त्रियांना भेडसावणाऱ्या समस्यांचा आढावा घेत त्यांनी गैरसमज दूर करून उपाय सुचविले. दुसऱ्या सत्रात अॅड. असुंता पारधे यांनी महिलांच्या कायदेशीर हक्कांबाबत मार्गदर्शन करत सामाजिक परिवर्तनाची गरज अधोरेखित केली. त्यांनी लिंगभाव, पितृसत्ता व महिलांवरील अन्याय यांचा परस्परसंबंध स्पष्ट करून सजग नागरिकांनी समाजपरिवर्तनात पुढाकार घ्यावा, असे आवाहन केले. कार्यशाळेचे संयोजन प्रा. माधुरी शिर्लेकर, प्रा. सोनल पांढरे आणि प्रा. डॉ. रवींद्र पाटील यांनी केले.