अवसरीचे २४ पर्यटक उत्तराखंडमध्ये सुखरूप

पुणे, ता. ६ : उत्तराखंडमध्ये अडकलेले अवसरी खुर्द (ता. आंबेगाव) येथील २४ पर्यटक सुखरूप आहेत. आपत्ती व्यवस्थापन विभागाशी त्यांचा संपर्क झाला असल्याचे जिल्हा प्रशासनाकडून सांगण्यात आले.
अवसरी खुर्द येथील २४ जण ऋषिकेश येथे दर्शनासाठी गेले होते. मंगळवारी (ता. ५) झालेल्या ढगफुटीमुळे देशभरातील अनेक भाविक आणि पर्यटक त्यामध्ये अडकले असण्याची भीती व्यक्त केली जात आहे. अतिवृष्टी आणि खराब हवामानामुळे या भागातील संपर्क यंत्रणा पूर्णपणे कोलमडली आहे. त्यामुळे या १७ पर्यटकांशी संपर्क होऊ शकला नव्हता. सायंकाळी उशीरा उत्तरखंड आपत्ती व्यवस्थापन विभागाशी संपर्क झाल्यानंतर हे सर्व प्रवासी सुखरूप असल्याचे सांगण्यात आले. हिना चेक पोस्ट येथून ते पुढे आले असल्याचे प्रशासनाकडून सांगण्यात आले. महाराष्ट्रातील जवळपास दीडशे प्रवासी असल्याचेही प्रशासनाकडून सांगण्यात आले.
दरम्यान, जिल्हाधिकारी कार्यालयाने या पर्यटकांची माहिती राज्य सरकारला पाठविली आहे. मंत्रालयातील विभाग उत्तराखंडच्या आपत्ती व्यवस्थापन विभागाच्या संपर्कात असून, परिस्थितीवर लक्ष ठेवून आहे, असे आपत्ती व्यवस्थापन विभागाकडून सांगण्यात आले.