‘नासा’ला जाण्याची २५ विद्यार्थ्यांना संधी जिल्हा परिषदेचा उपक्रम; पन्नास विद्यार्थी ‘इस्रो’ला जाणार

पुणे, ता. १८ ः जिल्हा परिषदेच्या शाळेत शिक्षण घेत असलेल्या पंचवीस विद्यार्थ्यांना ‘नासा’ला जाण्याची संधी मिळाली आहे तर ५० विद्यार्थी हे ‘इस्रो’ या अंतराळ संशोधन केंद्राच्या भेटीसाठी जाणार आहेत. आंतरविद्यापीठ खगोलशास्त्र व खगोलभौतिकशास्त्र केंद्राकडून (आयुका) जिल्हा परिषदेला निकाल पाठवला आहे. त्यामध्ये शिरूर आणि खेड तालुक्यातील प्रत्येकी चार विद्यार्थ्यांचा समावेश असल्याची माहिती जिल्हा परिषदेचे मुख्य कार्यकारी अधिकारी गजानन पाटील यांनी सोमवारी पत्रकार परिषदेत दिली.
जिल्हा परिषदेच्या शाळांमध्ये शिकणाऱ्या विद्यार्थ्यांना ‘इस्रो’ आणि ‘नासा’ या अंतराळ संशोधन संस्थांना भेटीची संधी मिळण्यासाठी तीन टप्प्यांत होणाऱ्या चाचणी परीक्षांचे नियोजन करण्यात आले होते. त्यापैकी एक लेखी परीक्षा आणि दुसरी ऑनलाइन परीक्षा घेण्यात आली. दुसऱ्या ऑनलाइन परीक्षेमधून १३ टक्के विद्यार्थ्यांची निवड करण्यात आली. आयुकामध्ये ता. ६ ते ता. ८ ऑगस्ट दरम्यान २३५ विद्यार्थ्यांच्या मुलाखती घेण्यात आल्या. त्यामधून ७५ विद्यार्थ्यांची अंतिम यादी तयार करण्यात आली आहे. जिल्हा परिषदेकडून राबविण्यात येत असलेल्या या उपक्रमासाठी घेण्यात आलेल्या परीक्षेसाठी ‘आयुका’ या संस्थेच्या मार्गदर्शनाखाली परीक्षेचा अभ्यासक्रम तयार करण्यात आला होता. शिरूर आणि खेड तालुक्यातील प्रत्येकी चार विद्यार्थी, आंबेगाव, बारामती, भोर, दौंड, हवेली, मुळशी तालुक्यातील प्रत्येकी दोन तर इंदापूर, जुन्नर, मावळ, पुरंदर आणि राजगड तालक्यातील एका विद्यार्थ्याची ‘नासा’ला जाण्यासाठी निवड करण्यात आली आहे. निवड झालेल्या विद्यार्थ्यांच्या प्रवासाचे नियोजनाचे काम जिल्हा परिषदेने सुरू केले असल्याची माहिती पाटील यांनी दिली.

दृष्टिक्षेपात
विद्यार्थ्यांचे अर्ज ः १६ हजार १२१
पहिली परीक्षा दिलेले विद्यार्थी ः १३ हजार ६७१
दुसरी ऑनलाइन परीक्षा दिलेले विद्यार्थी ः एक हजार ५४१
मुलाखतीसाठी पात्र विद्यार्थी ः २३५
नासा, इस्रोला जाण्यासाठी पात्र विद्यार्थी ः ७५

हे पंचवीस विद्यार्थी जाणार नासाला...
सिद्धी मंजिरे (मोरडेवाडी, ता. आंबेगाव), रुद्र मोरडे (मोरडेवाडी, ता. आंबेगाव), भास्कर तावरे (सांगवी, ता. बारामती), सोहम टेंभरे (सांगवी, ता. बारामती), अदिती राऊत (धावडी, ता. भोर), अदिती पारथे (निगुडघर, ता. भोर), स्पृहा खेडेकर (शेलारमेमानवाडी, ता. दौंड), आयुष शेलार (गलांडवाडी, ता. दौंड), शंतनू कदम (लोणीकंद, हवेली), श्रावणी मगर (लोणीकंद, हवेली), मोहम्मद उमर शेख (शहा, ता. इंदापूर), साईराज पवार (आळेफाटा, ता. जुन्नर), वेदिका गुजर (भोसे, ता. खेड), सिद्धांत शेकडे (धानोरे, ता. खेड), हर्षवर्धन कोहिनकर (दोंदे, ता. खेड), संभवा राक्षे (थिगळस्थळ, ता. खेड), रुद्र राजगुरू (कान्हे, ता. खेड), दर्शन अडसोड (हिंजवडी, ता. मुळशी), आदित्य आहेर (माण, ता. मुळशी), शिवम बडदे (कोडीत, ता. पुरंदर), कस्तुरी मुसमाडे (कोरेगाव भीमा, ता. शिरूर), स्वरूप भागवत (वाबळेवाडी, ता. शिरूर), स्वरूप बऱ्हाते (पिंपरखेड, ता. शिरूर), शिवम जाधव (कोयाळी, ता. शिरूर), शुभ्रा रेणुसे (पाबे, ता. राजगड)