बाह्यवळण मार्गावर प्रवासी बसला आग

पुणे, ता. १८ ः मुंबई-बंगळूर बाह्यवळण मार्गावर नऱ्हे परिसरात प्रवासी वाहतूक करणाऱ्या बसला आग लागली. आगीत बस पूर्णपणे जळाली असून, प्रवासी वेळीच बाहेर पडल्याने मोठी दुर्घटना टळली. सुदैवाने या घटनेत कोणी जखमी झाले नाही.

बाह्यवळण मार्गावरून रविवारी (ता. १७) मध्यरात्री दोनच्या सुमारास प्रवासी बस निघाली होती. नऱ्हे परिसरातील श्री स्वामी नारायण मंदिराजवळ धावत्या बसमधून धूर येण्यास सुरुवात झाली. हा प्रकार बसचालकाच्या निदर्शनास आला. त्यामुळे बसमधील वाहकाने त्वरित गाढ झोपेत असलेल्या प्रवाशांना जागे केले. आग लागल्याची माहिती मिळताच घाबरलेले प्रवासी तातडीने बसमधून बाहेर पडले.

या घटनेची माहिती मिळताच अग्निशामक दलाच्या जवानांनी घटनास्थळी धाव घेतली. प्रभाकर उमराटकर यांच्या मार्गदर्शनाखाली जवानांनी पाण्याचा मारा करून आग आटोक्यात आणल्याची माहिती सिंहगड रस्ता अग्निशमन केंद्राचे प्रमुख प्रभाकर उमराटकर यांनी दिली.