राज्यपालांच्या हस्ते पुणे फेस्टिव्हलचे उद्‍घाटन

पुणे, ता. १८ ः पुण्यातील सांस्कृतिक महोत्सवांचा मानबिंदू असणारा ‘पुणे फेस्टिव्हल’ यंदा २७ ऑगस्ट ते ६ सप्टेंबर या काळात होणार आहे. महोत्सवाचे उद्‍घाटन शुक्रवारी (ता. २९) सायंकाळी ४.३० स्वारगेट येथील गणेश कला-क्रीडा मंच येथे महाराष्ट्राचे राज्यपाल सी. पी. राधाकृष्णन यांच्या हस्ते होणार असून, या वेळी केंद्रीय पर्यटन व सांस्कृतिक मंत्री गजेंद्रसिंह शेखावत, केंद्रीय नागरी विमान वाहतूक व सहकार राज्यमंत्री मुरलीधर मोहोळ आदी उपस्थित राहणार आहेत.

पुणे फेस्टिव्हलचे उपाध्यक्ष कृष्णकुमार गोयल आणि मुख्य संयोजक अॅड. अभय छाजेड यांनी सोमवारी पत्रकार परिषदेत ही माहिती दिली. याप्रसंगी पुणे फेस्टिव्हलचे सांस्कृतिक कार्यक्रम समन्वयक डॉ. सतीश देसाई, माजी गृहराज्यमंत्री रमेश बागवे, ‘आझम कॅम्पस’चे विश्वस्त अब्दुल इनामदार आदी उपस्थित होते.

पुणे फेस्टिव्हलमध्ये दिला जाणारा ‘जीवनगौरव पुरस्कार’ यंदा भारती विद्यापीठाचे कुलगुरू डॉ. शिवाजीराव कदम आणि डॉ. पी. ए. इनामदार विद्यापीठाचे कुलगुरू डॉ. पी. ए. इनामदार यांना दिला जाणार आहे. ज्येष्ठ नाटककार सतीश आळेकर, भारतीय क्रिकेटपटू केदार जाधव, ‘महाराष्ट्र केसरी’ पृथ्वीराज मोहोळ, माऊली कृषी पर्यटन केंद्राचे ज्ञानदेव कामठे आणि उद्योजिका सुप्रिया बडवे यांना ‘पुणे फेस्टिव्हल अवॉर्ड’ने देऊन गौरविले जाईल, तसेच, रास्ता पेठेतील नायडू गणपती मंडळाला ‘जय गणेश पुरस्कारा’ने गौरविले जाईल.

अशोक हांडे प्रस्तुत ‘आवारा हूँ’ कार्यक्रम, ऑल इंडिया मुशायरा, मनीषा साठे प्रस्तुत ‘डिव्हाइन कॉन्फ्लुएन्स’ (जपानी नृत्याविष्कार), केरळ महोत्सव, वृत्तपत्र छायाचित्रकारांचे छायाचित्र प्रदर्शन, व्यंग्यचित्रकारांचे प्रदर्शन यासह विविध कला व क्रीडा स्पर्धा, ही यंदाच्या पुणे फेस्टिव्हलची वैशिष्ट्ये आहेत. हे सर्व कार्यक्रम गणेश कला-क्रीडा मंच, बालगंधर्व रंगमंदिर व कलादालन, महाराष्ट्र साहित्य परिषद, सावरकर स्मारक भवन आदी ठिकाणी होणार आहेत. सर्व कार्यक्रम रसिकांसाठी विनामूल्य आहेत.