तीन मुलींसह आठजणांवर गुन्हा दाखल कोथरूड पोलिसांवर जातीवाचक शिवीगाळीचे आरोपप्रकरण

पुणे, ता. १८ ः कोथरूड पोलिसांनी चौकशीदरम्यान जातिवाचक शिवीगाळ केल्याच्या आरोप करणाऱ्या तीन मुलींसह एकूण आठ जणांवर गुन्हा दाखल करण्यात आला आहे. पोलिस आयुक्तालयात आंदोलन करून सरकारी कामात अडथळा आणल्याप्रकरणी हा गुन्हा दाखल झाला आहे.
या प्रकरणी सागर आल्हाट, स्वप्नील वाघमारे, दत्ता शेंडगे, ॲड. परिक्रमा खोत, श्वेता पाटील, नितीन पाटील, ऋषिकेश भोलाने आणि ॲड. रेखा चौरे यांच्यावर भारतीय न्याय संहितेच्या विविध कलमांनुसार बंडगार्डन पोलिस ठाण्यात गुन्हा दाखल करण्यात आला आहे.
छत्रपती संभाजीनगरमध्ये अन्याय झाल्याने पुण्यात आल्यानंतर पोलिसांनी चौकशीदरम्यान कोथरूड पोलिस ठाण्यात नेवून जातिवाचक शिवीगाळ आणि मारहाण केल्याचा आरोप तीन मुलींनी केला होता. या प्रकरणी पोलिसांवर गुन्हा दाखल करण्याची मागणी मुली व तिच्या सहकाऱ्यांनी केली होती. याबाबत त्यांनी पोलिसांकडे दाद मागायला सुरवात केली. कोथरूड पोलिसांविरोधात ॲट्रॉसिटीचा गुन्हा दाखल करावा, या मागणीसाठी मुलींसह इतरांनी तीन ऑगस्टला पोलिस आयुक्तालयात सकाळी १० पासून रात्री तीन वाजेपर्यंत आंदोलन केले. तसेच, गुन्हा नोंदवावा अशी मागणी केली होती.
पोलिस आयुक्तालयात झालेल्या आंदोलनात आमदार रोहित पवार, सामाजिक कार्यकर्त्या अंजली आंबेडकर आणि सुजात आंबेडकर हे देखील सहभागी झाले होते. त्यांनी या आंदोलनाला पाठिंबा दिला होता.
मात्र, या संपूर्ण प्रकरणात तथ्य आढळले नाही. संपूर्ण घटना एका बंदिस्त ठिकाणी घडल्याचे पत्र पुणे पोलिसांनी आंदोलकांना दिले होते. पण, श्वेता पाटील हिने पोलिसांसमोर हे पत्र फाडून टाकले होते. त्यानंतर दोन मुलींचे वैद्यकीय अहवाल समोर आले होते. त्यात मारहाण केल्याच्या कोणत्याही ताज्या जखमा किंवा व्रण नसल्याचे समोर आले होते.

तक्रारीत काय नमूद आहे?
आंदोलनकर्त्यांनी वरिष्ठ पोलिस अधिकाऱ्यांचे न ऐकता सरकारी कामात अडथळा निर्माण केला. आरडाओरडा करून प्रक्षोभक व भडकावू घोषणा देऊन सार्वजनिक शांततेचा भंग केला. तसेच असुरक्षितता व भितीचे वातावरण निर्माण केले. त्यांनी पोलिस आयुक्त कार्यालयात कायदा व सुव्यवस्था राखण्याच्या आदेशाचे उल्लंघन केले, असे तक्रारीत नमूद आहे.