भूमी अभिलेखचे वरिष्ठ अधिकारी थेट फिल्डवर

पुणे, ता. १८ : ‘ई-मोजणी व्हर्जन २’चे सॉफ्टवेअर कसे काम करते, रोव्हरच्या मदतीने कशी मोजणी केली जाते, नेमक्या काय अडचणी येतात, यांची माहिती प्रत्यक्ष कार्यालयात बसणाऱ्या अधिकाऱ्यांना व्हावी, यासाठी भूमी अभिलेख विभागाने विशेष मोहीम हाती घेतली आहे. उपअधिक्षक, नगरभूमापन अधिकारी आणि जिल्हा अधीक्षक यांना प्रत्यक्षात फिल्डवर जाऊन याची माहिती घेत आहेत. प्रथमच अशाप्रकारचा उपक्रम विभागाच्या वतीने राबविण्यात येत आहे.
महसूल विभागाचा एक भाग म्हणून भूमी अभिलेख विभागाकडे पाहिले जाते. या विभागामध्ये सध्या मोठ्या प्रमाणावर आधुनिक तंत्रज्ञानाचा वापर करून नागरिकांना सुविधा देण्याचे काम हाती घेण्यात आले आहे. तसेच सध्या असलेल्या ऑनलाइन सुविधांचे अद्ययावतीकरण करण्याचे काम सुरू आहे. हे करताना प्रत्यक्षात जागेवर काय अडचणी येतात, हे अनेकदा अधिकाऱ्यांना समजून येत नाही. त्याची जाणीव व्हावी, दाखल होणाऱ्या तक्रारींची सत्यता लक्षात यावी, नोंदी घेताना अथवा मोजणी करताना कशाप्रकारे चुका होतात, त्या कशा टाळता येतील, यांची माहिती कार्यालयात बसणाऱ्या अधिकाऱ्यांना व्हावी, यासाठी महसूलमंत्री चंद्रशेखर बावनकुळे यांच्या आदेशावरून विभागाने हा उपक्रम हाती घेतला आहे. त्यासाठी वर्ग १ आणि २ च्या अधिकाऱ्यांचे नुकतेच प्रशिक्षण घेण्यात आले. त्यांनंतर आता त्यांना फिल्डवर जाऊन माहिती घेण्याचे प्रशिक्षण सुरू केले आहे.

‘‘विभागाकडून नवीन तंत्रज्ञानाचा अवलंब केला जात आहे. प्रत्यक्षात जागेवर त्यांचा कशाप्रकारे वापर होतो. यांची माहिती अधिकाऱ्यांना व्हावी यासाठी हा उपक्रम हाती घेतला आहे. विभागातील सर्व वरिष्ठ अधिकारी प्रत्यक्ष जागेवर जाऊन त्याची माहिती घेत आहेत. प्रथमच असा उपक्रम राबविण्यात येत आहे.’’
- डॉ. सुहास दिवसे, आयुक्त, जमाबंदी