बिबवेवाडीत टोळक्याकडून तरुणावर तीक्ष्ण शस्त्राने वार

पुणे, ता. १९ : वैमनस्यातून टोळक्याने तरुणावर तीक्ष्ण शस्त्राने वार केल्याची घटना बिबवेवाडीतील सिद्धार्थनगर परिसरात घडली. तरुणाला वाचविण्यासाठी भांडणात मध्यस्थी करणाऱ्या मित्राला मारहाण करून त्याच्या डोक्यात दगड घातला. या घटनेत तरुणासह त्याचा मित्र जखमी झाला आहे. याप्रकरणी टोळक्यावर खुनाचा प्रयत्न केल्याप्रकरणी गुन्हा दाखल करण्यात आला आहे.
अभय रमेश साठे (वय २३, रा. सिद्धार्थनगर, सुपर इंदिरानगर, बिबवेवाडी), सचिन अरुण नागटिळक (वय ३७) अशी जखमी झालेल्यांची नावे आहेत. याप्रकरणी सोनवणे, चव्हाण यांच्यासह पाच ते सहा साथीदारांविरुद्ध खुनाचा प्रयत्न केल्याप्रकरणी गुन्हा दाखल करण्यात आला आहे. याबाबत साठे याने बिबवेवाडी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, साठे हे रविवारी (ता. १७) मित्राच्या मुलीचा वाढदिवस साजरा करून रात्री दहाच्या सुमारास घरासमोर थांबले होते. त्या वेळी आरोपी तेथे आले. त्यांच्याकडे तीक्ष्ण शस्त्रे होती. आरोपींनी साठे यांच्या डोळ्यांत स्प्रे मारला. त्यामुळे साठे यांना दिसेनासे झाले. त्यानंतर आरोपींनी त्यांच्या डोक्यात कोयत्याने वार केला. साठे याचा मित्र नागटिळक तेथे थांबला होता. त्याने हा प्रकार पाहिला. साठे याला वाचविण्यासाठी त्याने मध्यस्थी केली. आरोपींनी नागटिळक याला शिवीगाळ करून डोक्यात दगड मारला. त्यानंतर आरोपींनी शिवीगाळ करून परिसरात दहशत माजविली. सहाय्यक पोलिस निरीक्षक प्रवीण पाटील या गुन्ह्याचा तपास करत आहेत.