घाटमाथ्यावर मुसळधारेची शक्यता

पुणे, ता. १९ : राज्यात पावसाने दमदार हजेरी लावली असतानाच बुधवारीही (ता. २०) कोकणासह घाटमाथ्यावर पावसाचा जोर कायम राहील, असा अंदाज आहे, तर रायगडसह पुणे जिल्ह्याच्या घाटमाथ्यावर मुसळधार पावसाची शक्यता असून, भारतीय हवामानशास्त्र विभागाने सर्तकतेचा इशारा (रेड अलर्ट) दिला आहे.
दरम्यान, दक्षिण ओडिशावर तीव्र कमी दाबाचे क्षेत्र स्थित आहे. पश्चिम-मध्य भारत आणि पूर्व-पश्चिम बंगालचा उपसागर येथील हे कमी दाबाचे क्षेत्र आहे, तर दक्षिण गुजरात ते उत्तर केरळ किनारपट्टीवर वातावरणाच्या खालच्या थरातील वाऱ्याची द्रोणिका रेषा सक्रिय आहे. उत्तर-पूर्व अरबी समुद्रात आणि गुजरातलगत वाऱ्यांची चक्राकार स्थिती निर्माण झाली आहे. परिणामी राज्यात पावसास अनुकूल वातावरण निर्माण झाले असून, त्यामुळे पावसाचा जोर वाढला आहे. राज्यात सर्वदूर पावसाने मंगळवारी दमदार हजेरी लावली आहे. गोव्यासह संपूर्ण राज्यात बहुतांश ठिकाणी मंगळवारी पाऊस झाला. कोकण-गोव्यासह मध्य महाराष्ट्रात काही ठिकाणी जोरदार पाऊस झाला.
हवामानशास्त्र विभागाने दिलेल्या अंदाजानुसार, कोकण-गोवा आणि विदर्भात बहुतांश ठिकाणी, मध्य महाराष्ट्र आणि मराठवाड्यात बऱ्याच ठिकाणी बुधवारी पावसाची शक्यता आहे. रायगड आणि पुणे जिल्ह्यात घाटमाथ्यावर काही ठिकाणी मुसळधार ते अति मुसळधार पावसाची शक्यता असून, सावधानतेचा इशारा (रेड अलर्ट) दिला आहे, तर पालघर, ठाणे, मुंबई, रत्नागिरी, नाशिक, कोल्हापूर, सातारा जिल्ह्यांच्या घाट विभागात तुरळक ठिकाणी मुसळधार ते अति मुसळधार पावसाची आणि नंदुरबार जिल्ह्यात तुरळक ठिकाणी मेघगर्जनेसह मुसळधार ते अति मुसळधार पावसाची (ऑरेंज अलर्ट) शक्यता आहे. उर्वरित जिल्ह्यात बुधवारी मेघगर्जनेसह हलक्या ते मध्यम स्वरूपाचा पाऊस पडेल, असा अंदाज हवामानशास्त्र विभागाने वर्तविला आहे.

आजचा अंदाज
इशारा : असा असेल पाऊस : ठिकाणे
- रेड अलर्ट : मुसळधार पावसाचा इशारा : रायगड जिल्हा, पुणे जिल्ह्यातील घाटमाथा
- ऑरेंज अलर्ट : जोरदार पावसाचा इशारा : ठाणे, पालघर, मुंबई, रत्नागिरी, नंदूरबार, नाशिक, सातारा घाटमाथा, कोल्हापूर घाटमाथा