सात धरणे भरली काठोकाठ

पुणे, ता. १९ : जिल्ह्यातील मुळशी तालुक्यातील चार, मावळ तालुक्यातील दोन आणि भोरमधील एका मंडळामध्ये अतिवृष्टी झाली आहे, तर जिल्ह्यातील २६ पैकी ७ धरणे काठोकाठ भरली आहेत. दरम्यान, जिल्ह्यात धरणांतील पाण्याच्या विसर्गामुळे बाधित होणारा पूरग्रस्त भाग तसेच दरडप्रवणग्रस्त भागातील नागरिकांचे सुरक्षित ठिकाणी स्थलांतर करावे, असे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डुडी यांनी मंगळवारी दिले.
जिल्हा आपत्ती व्यवस्थापन प्राधिकरणाच्या आढावा बैठकीत जिल्हाधिकाऱ्यांनी हे आदेश दिले. यावेळी पिंपरी-चिंचवड महापालिकेचे आयुक्त शेखर सिंह, जिल्हा परिषदेचे मुख्याधिकारी गजानन पाटील, जिल्हा पोलिस अधीक्षक संदीप गिल तसेच अन्य विभागातील अधिकारी उपस्थित होते.
डुडी म्हणाले, ‘‘भारतीय हवामानशास्त्र विभागाने बुधवारीही (ता. २०) घाटमाथा परिसरात रेड अलर्ट तर शहर आणि ग्रामीण भागात ऑरेंज अलर्ट दिलेला आहे. जिल्ह्यात पावसाची संततधार सुरू असून, जी धरणे भरली आहेत, त्या ठिकाणी जलसंपदा व शासकीय यंत्रणेमार्फत लक्ष ठेवण्यात येत आहे. जलसंपदा विभागाने पावसाचा अंदाज आणि धरणातील आवक लक्षात घेता विसर्गाबाबत नियोजन करावे. नदीकाठच्या लोकांना ज्या ठिकाणी धोका पोहचण्याची शक्यता आहे, त्यांना सावध करण्यासाठी शासकीय यंत्रणेमार्फत संदेश पोहोचविण्याचे काम करण्यात येत आहे. सर्व नागरिकांनी खबरदारी घ्यावी.’’
जिल्ह्यात मंगळवारी मावळ व मुळशी तालुक्यांमध्ये काही ठिकाणी मुसळधार पाऊस झाला आहे. त्यात मुळशी तालुक्यातील माले, मुठा, सावरगाव व कोळवण तर मावळ तालुक्यातील कार्ला, लोणावळा तसेच भोर तालुक्यातील भोर मंडळात अतिवृष्टी झाली आहे. जिल्ह्यात मुळशी, मावळ या तालुक्यांचा अपवाद वगळता अन्य तालुक्यांमध्ये तुरळक पावसाची नोंद करण्यात आली. पुणे शहर व हवेली, पुरंदर तालुक्यांत मंगळवारी मध्यम स्वरूपाचा पाऊस झाला. जिल्ह्यात सोमवारी एकूण १३५ मिलिमीटर तर मंगळवारी ४२८ मिलिमीटर पाऊस झाला.
दरम्यान, कृषी विभागाने दिलेल्या आकडेवारीनुसार जिल्ह्यात ऑगस्टमध्ये सरासरी २४७.४ मिलिमीटर पाऊस पडतो. आतापर्यंत जिल्ह्यात १११.७ मिलिमीटर अर्थात सरासरीच्या ४५ टक्के पाऊस पडला आहे. जिल्ह्यात आतापर्यंत १३ दिवस पाऊस झाला आहे.