केंद्रीय मंत्र्यांच्या हस्ते उद्या नोटरी परिषदेचे उद्‍घाटन

पुणे, ता. ७ ः महाराष्ट्र व गोवा नोटरी असोसिएशनतर्फे आयोजित पाचव्या नोटरी परिषदेचे उद्‍घाटन केंद्रीय कायदा व न्याय राज्य मंत्री अर्जुन राम मेघवाल यांच्या हस्ते शनिवारी (ता. ९) चिंचवड येथील प्रा. रामकृष्ण मोरे सभागृहात सकाळी दहा वाजता होईल.
‘तंत्रज्ञानाच्या युगात नोटरींचे कायदेशीर सक्षमीकरण’ या विषयावर ही परिषद होणार आहे. हा कार्यक्रम सर्वांसाठी खुला आहे. या परिषदेत नोटरी पदाचा दर्जा, व्यावसायिक सक्षमता व तांत्रिक सुधारणांवर भर दिला जाणार आहे. याप्रसंगी सर्वोच्च न्यायालयाचे न्यायमूर्ती प्रसन्न बी. वराळे यांच्यासह मुंबई उच्च न्यायालयाचे न्यायमूर्ती संदीप मारणे, आरिफ एस. डॉक्टर, रेवती मोहिते-डेरे, तसेच पुणे जिल्हा प्रमुख व सत्र न्यायाधीश एम. के. महाजन, विधानसभेचे उपसभापती अण्णासाहेब बनसोडे आदी उपस्थित असतील, तसेच या परिषदेला खासदार श्रीरंग बारणे, आमदार महेश लांडगे, शंकर जगताप आदी उपस्थित असतील. त्याचबरोबर या वेळी असोसिएशनतर्फे ज्येष्ठ वकिलांचा सत्कार होणार आहे, अशी माहिती असोसिएशनचे अध्यक्ष ॲड. सय्यद सिकंदर अली, कार्याध्यक्ष ॲड. यशवंत खराडे, सचिव ॲड. प्रवीण नलवडे, ॲड. अतिश लांडगे यांनी गुरुवारी पत्रकार परिषदेत दिली.
----------------