समाविष्ट गावातील मंडळांना नव्याने परवानगी महापालिका प्रशासनाकडून गणेशोत्सवासाठी नियमावली जाहीर

पुणे, ता. ४ ः राज्य सरकारने दिलेल्या आदेशाप्रमाणे २०२२ मध्ये गणेशोत्सवासाठी परवानगी घेतलेल्या मंडळांना यंदा परवानगी घेण्याची गरज नाही. मात्र, प्रकल्पामुळे किंवा अन्य कारणांमुळे जागा बदल झालेल्या मंडळांना तसेच समाविष्ट गावांमधील मंडळांना नव्याने परवानगी घ्यावी लागणार आहे, असे महापालिका प्रशासनाने स्पष्ट केले आहे.
शहरातील गणेशोत्सवाबाबत महापालिकेकडून दरवर्षी नियमावली जाहीर केली जाते. त्यानुसार, यंदाही महापालिकेचे आयुक्त नवल किशोर राम यांनी नियमावली जाहीर केली आहे. वर्षानुवर्षे गणेशोत्सव साजरा करणाऱ्या मंडळांना कुठल्याही प्रकारच्या नव्या परवानगीची गरज लागणार नाही. गणेशोत्सव मंडळांना उत्सव मंडप, स्वागत कमानी व रनिंग मंडप आदीबाबतच्या परवानग्या २०१९ मध्ये देण्यात आल्या होत्या. त्यानुसार, राज्य सरकारने २०२२ पासून पुढे पाच वर्षांसाठी २०१९ मध्ये दिलेल्या परवानग्या ग्राह्य धरल्या जाणार आहेत, असे स्पष्ट केले आहे. त्यामुळे संबंधित मंडळांना नव्याने परवानगी घेण्याची गरज भासणार नाही. मात्र, काही गणेशोत्सव मंडळांची जागा प्रकल्प बाधित झालेली असल्यास किंवा इतर काही कारणांमुळे बदल झालेला असल्यास नवीन जागेवरील सर्व परवानग्या २०१९ च्या कार्यपद्धतीप्रमाणे नव्याने घ्याव्या लागणार आहेत. याबरोबरच शहरात नव्याने समाविष्ट झालेल्या गावांमधील गणेशोत्सव मंडळांनाही स्थानिक पोलिस, वाहतूक विभाग व महापालिकेच्या क्षेत्रीय कार्यालयाकडून नव्याने परवानग्या घ्याव्या लागणार आहेत. त्यांना कोणत्याही प्रकारचे शुल्क लागणार नसल्याचे महापालिकेने नमूद केले आहे.
--------
* महापालिकेची नियमावली
- नव्याने परवानग्या घेणाऱ्यांसाठी पोलिस व महापालिकेची ‘एक खिडकी योजना’ सुरू
- मंडप उभारणीसाठी उच्च न्यायालयाने दिलेल्या आदेशांचे पालन करावे
- मंडपांची उंची ४० फुटापेक्षा जास्त नसावी, ४० फुटापेक्षा जास्त उंची असल्यास सुरक्षेसाठी स्थापत्य अभियंत्यांचे प्रमाणपत्र जोडावे
- रुग्णवाहिका, अग्निशामक दल, प्रवासी बस यासाठी रस्ते मोकळे ठेवावेत
- कमानींची उंची रस्त्याच्या पृष्ठभागापासून १८ फुटापेक्षा जास्त असावी
- आवश्‍यकतेनुसार स्वयंसेवक/सुरक्षा रक्षक नेमावेत
- पर्यावरणपूरक व शाडूच्या गणेश मूर्तींना प्राधान्य द्यावे
- उत्सव संपल्यानंतर तीन दिवसात रस्त्यांवरील देखावे, मंडप, स्टेज, कमानी, बांधकामे काढून घ्यावेत
- उत्सव काळात रहिवासी, पादचाऱ्यांना अडथळा होणार नाही, ध्वनी प्रदूषण होणार नाही, याची दक्षता घ्यावी.
-------------