मुख्य जलवाहिनीची लवकरच दुरुस्ती

पुणे, ता. २२ ः खडकवासला धरणातून पर्वती जलशुद्धीकरण केंद्रापर्यंत पाणी आणण्यासाठी टाकण्यात आलेल्या तीन हजार मिलिमीटर व्यासाच्या जलवाहिनीची दुरुस्ती केली जाणार आहे. हे काम कमीत कमी तीन महिने चालणार आहे. त्यामुळे खडकवासला धरणातून पर्वती जलकेंद्रापर्यंत आता कालव्यातून पाणीपुरवठा केला जाणार आहे. पुढील काही दिवसांत हे काम सुरू होणार असल्याने पाणीपुरवठा काही प्रमाणात विस्कळित होण्याची शक्यता आहे.
पुणे शहराला खडकवासला धरणातून पाणीपुरवठा केला जातो. हे पाणी पुणे शहरात आणण्यासाठी १९९९ मध्ये तीन हजार मिमी व्यासाची मुख्य जलवाहिनी टाकण्यात आली. त्यानंतर पाण्याची मागणी वाढल्याने २०१७ मध्ये २५०० मिमी व्यासाची आणखी एक जलवाहिनी टाकण्यात आली. जलवाहिनीतून पाणी घेतले जात असल्याने पाण्याची चोरी, गळती कमी झाली. गेल्या काही वर्षांपासून या भागात मोठ्या प्रमाणात बांधकामे झाली आहेत. त्यामुळे लपून छपून या जलवाहिनीच्या वर राडारोडा टाकण्यामुळे अनेक ठिकाणी जलवाहिनीतून पाणीगळती होत आहे. महापालिकेने जलवाहिनीचे सर्वेक्षण केले असता, दुरुस्तीचे काम तातडीने करणे आवश्‍यक असल्याचे स्पष्ट झाले आहे.

सुमारे ५७ कोटींचा खर्च
खडकवासला ते पर्वती जलशुद्धीकरण केंद्र ही अकरा किलोमीटरची जलवाहिनी आहे. टप्प्याटप्प्याने जलवाहिनी दुरुस्त करण्यासाठी सहा महिन्यांचा कालावधी लागणार आहे. या कामाचा खर्च सुमारे ५७ कोटी रुपये इतका आहे. स्थायी समितीने पहिल्या टप्प्यात ३२ कोटींचा खर्च मंजूर केला आहे.

१९९९ मध्ये तीन हजार मिमी व्यासाची जलवाहिनी टाकण्यात आली असून, दुरुस्तीची गरज आहे. या काळात जलकेंद्राला कालव्यातून पाणीपुरवठा केला जाईल. तसेच याच जलवाहिनीवर १४ गावांचा पाणीपुरवठा अवलंबून आहे. त्यामुळे २५०० मिमी व्यासाच्या जलवाहिनीवर त्याचा भार देण्यात येईल. यासाठी व्हॉल्व्ह जोडणीचे काम केले जाणार आहे.
- नंदकिशोर जगताप, पाणीपुरवठा विभाग