अजरामर गीतांनी किशोरकुमार यांना स्वरांजली

पुणे, ता. ४ ः ‘सारा जमाना हसीनों का दीवाना’, ‘प्यार हमें इस मोड पे ले आया’, अशा उडत्या चालीच्या गाण्यांवर थिरकणारी रसिकांचे पावले... अन् ‘नीले नीले अंबर पर’, ‘कोरा कागज था ये मन मेरा’ अशा गीतांवर हलकेच डोलणाऱ्या माना, असे चित्र सोमवारी बालगंधर्व रंगमंदिरात पाहायला मिळाले. किशोरकुमार यांच्या ९६ व्या जन्मदिनानिमित्त कलाकारांनी आणि रसिकांनीही आपल्या या आवडत्या गायकाला अनोखी स्वरांजली दिली. निमित्त होते, सकाळ माध्यम समूहातर्फे आयोजित ‘दो किशोर’ या विशेष संगीत मैफिलीचे.

‘लोकमान्य मल्टिपर्पज को-ऑप सोसायटी लि.’ आणि ‘कोहिनूर ग्रुप-अ कृष्णकुमार गोयल एंटरप्राईज’ हे या कार्यक्रमाचे सहयोगी प्रायोजक होते. गायक जितेंद्र भुरूक आणि मकरंद पाटणकर यांनी आपल्या सहकाऱ्यांसह सादर केलेली ही मैफील उत्तरोत्तर रंगत गेली. याप्रसंगी ‘लोकमान्य मल्टिपर्पज को-ऑप सोसायटी लि.’चे विभागीय व्यवस्थापक सुशील जाधव, ‘कोहिनूर ग्रुप’चे अध्यक्ष कृष्णकुमार गोयल उपस्थित होते.

किशोरकुमार यांची लोकप्रिय आणि अजरामर गीते या मैफिलीत सादर झाली. यात ‘मेरे सपनो की राणी कब आयेगी तू’, ‘इस मोड से जाते है’, ‘एक लडकी भीगी भागी सीं’, ‘गाता रहे मेरा दिल’, ‘एक अजनबी’, ‘रूप तेरा मस्ताना’, ‘तेरे मेरे मिलन की ये रैना’, ‘शोर मच गया’, ‘बचना ए हसीनो’ आदी गीतांचा समावेश होता. रसिकांनाही प्रत्येक गीताला टाळ्यांची मनमुराद दाद दिली.

जितेंद्र भुरूक आणि मकरंद पाटणकर यांनी सादर केलेल्या गाण्यांना सहगायिका म्हणून कोमल कृष्णा यांनी साथ दिली. केदार परांजपे, मिहीर भडकमकर, मुकेश देढिया, लिजेस शशी धरण, बाबा खान, प्रसाद गोंदकर, सचिन वाघमारे, अजय अत्रे, नितीन शिंदे, सोमनाथ फाटके, सुनील साळवी, अभिषेक भुरूक या वादकांनी बहारदार वादनाने कार्यक्रमात रंग भरले. जी. महेश यांनी निवेदनातून मैफील सजवली. प्रमोद कांबळे यांनी मैफिली दरम्यान रेखाटलेल्या किशोरकुमार यांच्या चित्राला विशेष दाद मिळाली. रवींद्र खरे यांनी सूत्रसंचालन केले.