वातावरण कलुषित करण्याचा संभाजीराजे यांचा प्रयत्न : लक्ष्मण हाके

पुणे, ता. २५ : ‘‘छत्रपती शिवाजी महाराजांच्या रायगडावरील समाधिस्थळासमोर असणाऱ्या वाघ्या श्वानाच्या स्मारकाचा मुद्दा उपस्थित करून कोल्हापूरचे संभाजीराजे हे राज्यातील वातावरण कलुषित करण्याचा प्रयत्न करत आहेत. रायगड विकास प्राधिकरणाचे ते अध्यक्ष असून, किल्ले संवर्धन करण्याऐवजी ते नासधूस करण्याची भूमिका घेत आहेत. त्यांच्या या भूमिकेला विरोध आहे. त्यांची प्राधिकरणावरून हकालपट्टी करावी,’’ अशी मागणी ओबीसी समाजाचे नेते
लक्ष्मण हाके यांनी केली.
हाके यांनी आयोजित पत्रकार परिषदेत ही माहिती दिली. या वेळी इतिहास अभ्यासक संजय सोनवणी उपस्थित होते. हाके म्हणाले, ‘‘वाघ्या श्वानाच्या स्मारकावरून संभाजीराजे यांनी ३१ मेपर्यंत मुदत दिली आहे. त्यांनी ३१ मे हीच तारीख का निवडली? या दिवशी पुण्यश्लोक अहिल्यादेवी होळकर यांची जयंती असते. यंदा अहिल्यादेवी होळकर यांच्या जयंतीनिमित्त होणाऱ्या कार्यक्रमात त्यांच्या जन्मगावी पंतप्रधानांना आमंत्रित करण्याचा आमचा प्रयत्न आहे. त्यामुळे संभाजीराजेंनी तोच दिवस का निवडला, असा प्रश्न उपस्थित होतो.’’
‘‘संभाजीराजे स्वत:च्या राजकीय हितासाठी छत्रपती शिवाजी महाराजांना केवळ एका जातीपुरते मर्यादित करण्याचा प्रयत्न करत आहेत,’’ असेही हाके यांनी सांगितले.
सोनवणी म्हणाले, ‘‘शिवाजी महाराजांचा वाघ्या हा श्वान नेहमी त्यांची सोबत करत होता, याचे अनेक पुरावे आहेत. त्यापैकी एक म्हणजे जर्मन सरकारने १८३४-५४ मध्ये पुस्तकांची सूची तयार केली आहे. त्यात रायगडावरील शिवाजी महाराजांच्या समाधिस्थळाजवळ असणाऱ्या श्वानाच्या स्मारकाचा सविस्तर उल्लेख आहे.’’
हाके म्हणाले, ‘‘संभाजीराजे यांनी रायगडावरील वाघ्या श्वानाचे स्मारक हटविण्याची मागणी मुख्यमंत्र्यांकडे केली आहे. त्यांच्या या भूमिकेला आमचा विरोध आहे. याबाबत मुख्यमंत्री देवेंद्र फडणवीस आणि पुरातत्त्व खात्याकडे पाठपुरावा करण्यात येणार आहे.’’