वैभव देशमुख यांच्या कवितासंग्रहाचे प्रकाशन

पुणे, ता. २५ ः गझलकार आणि कवी वैभव देशमुख यांच्या ‘हे सारे गुलमोहर माझे’ या गझल संग्रहाचे आणि ‘तृष्णाकाठ’ या कवितासंग्रहाचे प्रकाशन दिग्दर्शक-अभिनेते नागराज मंजुळे यांच्या हस्ते झाले.

‘न्यू ईरा पब्लिशिंग हाऊस’तर्फे आयोजित कार्यक्रमात सुरेश भट गझल मंचाचे संस्थापक शाहीर सुरेशकुमार वैराळकर, कवी व गझल अभ्यासक चित्तरंजन भट, मुंबईच्या यशवंतराव चव्हाण सेंटरचे कार्यक्रम संचालक दत्ता बाळसराफ, मराठवाडा आर्ट, कल्बर आणि फिल्म फाउंडेशनचे संचालक नीलेश राऊत, लेखक शरद तांदळे, प्रकाशिका अमृता तांदळे आदी उपस्थित होते.
‘‘माणसाला कवितेची ओळख व्हायची असेल, तर आधी दुःखाची ओळख व्हावी लागते. कविता माणसाच्या जीवनाला आकार देते. आपण दगड आहोत, याचा अहंकार बाळगून उपयोग नसतो. कारण कवितेत दगडलाही छेदण्याची ताकद असते,’’ असे मत मंजुळे यांनी व्यक्त केले. वैभव देशमुख यांनी निवडक गझल आणि कवितांचे सादरीकरण केले.