केशू फाउंडेशनतर्फे शालेय साहित्य वाटप

पुणे, ता. १५ ः केशू फाउंडेशनतर्फे इयत्ता पहिली ते बारावीतील अनाथ व आर्थिकदृष्ट्या दुर्बल विद्यार्थ्यांसाठी यंदाही लोकसहभागातून मोफत शालेय साहित्य वाटपाचा उपक्रम राबविण्यात येणार आहे. फाउंडेशनतर्फे गेल्या चार वर्षांपासून तीन हजारांहून अधिक अनाथ व आर्थिकदृष्ट्या दुर्बल विद्यार्थ्यांना या उपक्रमाअंतर्गत मदत करण्यात आली आहे.

समाजसेवेच्या माध्यमातून शिक्षणाच्या संधी उपलब्ध करून देण्याच्या उद्देशाने संस्थेतर्फे हा उपक्रम राबविला जात आहे. त्याचबरोबर संस्थेतर्फे विद्यार्थ्यांना त्यांच्या शाळेच्या अभ्यासक्रमाशी सुसंगत डिजिटल आणि संगणक प्रशिक्षण देण्यात येत आहे, तसेच ‘स्वयंसेवक-इंटर्नशिप प्रोग्रॅम’मार्फत विद्यार्थ्यांना इव्हेंट मॅनेजमेंट, सोशल मीडिया, ग्राफिक डिझाईन, वेब डेव्हलपमेंट आदी क्षेत्रात संधी उपलब्ध करून देण्यात संस्था कार्यरत असल्याची माहिती संस्थेचे संस्थापक अंकुश बिरादार यांनी दिली.