२२५ पीएमपीएमएल कर्मचाऱ्यांनी केले रक्तदान

पीएमपीच्या २२५ कर्मचाऱ्यांचे रक्तदान
पुणे, ता. १७ : पीएमपीतर्फे नरवीर तानाजी वाडी येथील आगारामध्ये झालेल्या शिबिरात २२५ पीएमपी कर्मचाऱ्यांनी रक्तदान केले. ससून सर्वोपचार रुग्णालयात उपचार घेणाऱ्या सर्वसामान्य, गरीब व गरजू रुग्णांना रक्त उपलब्ध करून देण्यासाठी पीएमपीच्या सर्व डेपो, दोन्ही मुख्यालये तसेच मुख्य प्रशासकीय कार्यालय येथे प्रत्येक महिन्यात रक्तदान शिबिराचे आयोजित करण्यात येणार आहे, अशी माहिती पीएमपीच्या परिवहन महामंडळाच्या अध्यक्ष व व्यवस्थापकीय संचालक दीपा मुधोळ-मुंडे यांनी दिली.
ससून रुग्णालयाचे सहयोगी अधिष्ठाता डॉ. महानंद माने यांनी या शिबिराचे उद्‍घाटन केले. यावेळी परिवहन महामंडळाचे सहव्यवस्थापकीय संचालक नितीन नार्वेकर, मुख्य कार्यकारी अधिकारी प्रज्ञा पवार-पोतदार, नरवीर तानाजी वाडी आगाराचे व्यवस्थापक संतोष किरवे, आगार अभियंता राजकुमार माने आदी उपस्थित होते.