धोकादायक वाडे महापालिकेने उतरवले

पुणे, ता. २४ : शहरातील जुने वाडे पावसाळ्यात कोसळून आर्थिक व जीवितहानी होण्याची शक्यता आहे. त्यामुळे पुणे महापालिकेच्या बांधकाम विभागाने सर्वेक्षण करून १०२ धोकादायक वाड्यांपैकी १३ वाडे उतरवले आहेत. आगामी १५ दिवसांत आणखी ६० वाडे उतरवले जाणार असल्याची माहिती बांधकाम विभागाने दिली.
शहराच्या मध्यवर्ती भागात अनेक जुने वाडे व इमारती आहेत. या मिळकतींबाबत मालक व भाडेकरूंमध्ये तसेच काही ठिकाणी मालकांमध्येच वाद निर्माण झाले आहेत. अनेक प्रकरणे न्यायप्रविष्ट असल्यामुळे या इमारतींमध्ये कोणीही राहत नाही, तसेच त्यांची देखभाल व दुरुस्तीही होत नाही. महापालिकेने केलेल्या पाहणीत १०२ इमारती अथवा वाडे अतिधोकादायक श्रेणीत असल्याचे आढळले असून, त्यापैकी ७७ ठिकाणी नागरिक वास्तव्यास आहेत. त्यामुळे महापालिकेने महाराष्ट्र प्रादेशिक नियोजन व नगररचना अधिनियमाच्या कलम १६० (ब) व (क) अंतर्गत नोटीस बजावत या इमारती रिकाम्या करण्याचे आदेश दिले आहेत.