मेंदूतील गुंतागुंतीच्या रचनेवर यशस्वी शस्त्रक्रिया

पुणे, ता. २५ : मेंदूतील गुंतागुंतीच्या रक्तवाहिन्यांच्या रचनेमुळे त्रस्त असलेल्या २४वर्षीय रुग्णावर बाणेर येथील मणिपाल हॉस्पिटलमध्ये अत्याधुनिक ‘हाय प्रिसिजन स्टिरिओस्टॅटिक रेडिओसर्जरी’ हे उपचार करण्यात आले. यापूर्वी २०२१ मध्ये रुग्णावर ‘गॅमानाइफ’ ही शस्त्रक्रिया केली होती, परंतु ती अपयशी ठरल्‍याने पुन्‍हा उपचार केले. या गुंतागुंतीच्‍या शस्त्रक्रियेद्वारे रुग्णाला नवजीवनाची आशा मिळाली आहे.
पुन्हा उद्‍भवणारी धमनी किंवा शिरेमधील विकृती (रिलॅप्स्ड आर्टेरिओव्हेनस मालफॉर्मेशन) यामध्‍ये मेंदूतील धमन्या व शिरांना कमकुवत रक्तवाहिन्यांद्वारे पुरवठा होतो, ज्यामुळे रक्तस्रावाचा धोका निर्माण होतो. या स्थितीमध्ये पारंपरिक शस्त्रक्रिया करणे अत्यंत अवघड असते. अशा प्रकरणात ‘स्टिरिओस्टॅटिक रेडिओसर्जरी’च्या माध्यमातून रेडिएशनचा डोस देऊन ही वैद्यकीय प्रक्रिया अधिक सुलभ करण्यात आल्याची माहिती रेडिएशन ऑन्कोलॉजिस्‍ट डॉ. करण चंचलानी यांनी दिली. ही गोष्ट खूपच आव्हानात्मक होती, कारण ही मेंदूच्या ठिकाणी उपचार प्रक्रिया असल्‍याने शस्त्रक्रिया झाल्यानंतर न्युरोलॉजिकल समस्या, आंधळेपणा, अर्धांगवायू अशी गुंतागुंत निर्माण होण्याची शक्यता असते. त्‍यासाठी काळजीपूर्वक उपचार केल्याचेही त्यांनी सांगितले, तसेच सध्या रुग्ण स्थिर असून उपचारांना सकारात्मक प्रतिसाद देत असल्याचे हॉस्पिटलचे संचालक आनंद मोटे यांनी सांगितले.