डॉक्टरांनी मार्गदर्शक तत्त्वांनुसार काम करावे

पुणे, ता. २५ : ‘‘पुणे पोलिसांनी व्हॉट्सॲप ग्रुप तयार केले आहेत. त्‍यावर डॉक्टर कोणत्याही समस्यांबाबत थेट तक्रार करू शकतात. डॉक्टरांनी कायदेशीर मार्गदर्शक तत्त्वांनुसार काम करावे,’’ असे मत नुकतीच मुंबई येथे बदली झालेले पुण्याचे गुन्‍हे विभागाचे अतिरिक्त पोलिस आयुक्त शैलेश बलकवडे यांनी व्‍यक्‍त केले.
पुणे ऑब्स्टेट्रिक्स अँड गायनॅकॉलॉजी सोसायटी (पीओजीएस) तर्फे संकल्पनेवर आधारित कायदेशीर वैद्यकीय प्रकरणावर चर्चासत्र (मेडिकोलीगल मास्टरक्लास) आयोजित केले होते. टिळक रस्‍त्‍यावरील आयएमए हॉल येथे झालेल्‍या या कार्यक्रमात १५५ हून अधिक स्त्रीरोगतज्‍ज्ञ सहभागी झाले होते. चर्चासत्राच्या उद्‍घाटन समारंभाला प्रमुख पाहुणे म्हणून अतिरिक्त पोलिस आयुक्त शैलेश बलकवडे आणि जिल्‍हा शल्‍यचिकित्‍सक डॉ. नागनाथ येमपल्‍ले उपस्थित होते.
या वेळी बलकवडे यांनी प्रसूतिपूर्व गर्भलिंगनिदान कायदा, पॉक्सो आणि वैद्यकीय गर्भपात कायद्याशी संबंधित प्रमुख मुद्द्यांवर मार्गदर्शन केले. डॉ. येमपल्ले यांनी महिलांचे जीव वाचवण्यासाठी स्त्रीरोग तज्ज्ञांच्या महत्त्वपूर्ण भूमिकेवर प्रकाश टाकला आणि आपत्कालीन परिस्थितीत डॉक्टर, रुग्ण आणि समाज यांच्यातील परस्पर समंजसपणाचे महत्त्व अधोरेखित केले.
या चर्चासत्राचे नेतृत्व ‘पीओजीएस’चे अध्यक्ष डॉ. मनीष माचवे, सरचिटणीस डॉ. नीलेश बलकवडे, खजिनदार डॉ. समिधा दळवी, मेडिकोलीगल समितीच्या अध्यक्षा डॉ. मीनाक्षी देशपांडे आणि ‘एमटीपी’ समितीच्या अध्यक्षा डॉ. मधू जुनेजा यांनी केले.