हडपसर स्टेशनला जोडणारे रस्ते होणार मोठे

पुणे, ता. २४ : पुणे स्टेशनवरून संपूर्ण देशात लांब पल्ल्याच्या रेल्वे गाड्या धावतात. पण हे स्टेशन त्यासाठी अपुरे पडत आहे. त्यामुळे रेल्वे प्रशासनाने हडपसर स्टेशनवरून गाड्या सोडण्यास सुरुवात केली आहे. मात्र या स्टेशनकडे जाणारे रस्ते अरुंद असल्याने प्रवाशांची गैरसोय होत असल्याने पुणे महापालिकेने तीन रस्त्यांच्या रुंदीकरणाची प्रक्रिया सुरू केली आहे. यातील काही रस्ते रेल्वेच्या जागेतून जात असल्याने महापालिकेने रस्ते करण्याची परवानगी मागितली आहे.
हडपसर रेल्वे स्टेशनवरून दररोज दहा गाड्या सोडल्या जातात. मात्र या स्थानकाकडे जाणारे रस्ते अरुंद असल्यामुळे नागरिकांना वाहतूक कोंडी, सुरक्षिततेचा अभाव यांसारख्या अडचणींचा सामना करावा लागत आहे. रेल्वे प्रशासनाच्या मागणीनुसार महापालिकेच्या पथ विभागाने या भागातील तीन प्रमुख रस्त्यांची पाहणी केली आहे.

रस्ता क्रमांक १
- ताडीगुत्ता चौक ते हडपसर रेल्वे स्थानक
- प्रस्तावित रुंदी ३० मीटर; सध्या ९ मीटर रुंदी
- बांधकामे झाल्याने रुंदीकरणात अडथळा येणार, बांधकाम न झालेला भाग किती याचे सर्वेक्षण करणार
- त्यानंतर जागा ताब्यात घेऊन प्रत्यक्ष कामाला सुरुवात होणार

रस्ता क्रमांक २
- मुंढवा येथील कोद्रे दवाखाना ते हडपसर स्थानक रस्ता
- प्रस्तावित रुंदी २४ मीटर; सध्या ९ ते १० मीटर
- येथेही भूसंपादन करून रुंदीकरण आवश्यक

रस्ता क्रमांक ३
- हडपसर स्थानक ते मुंढवा रेल्वे क्रॉसिंग पुलापर्यंत रस्ता
- लांबी ७०० मीटर; प्रत्यक्षात रुंदी ९ ते १२ मीटर
- या रस्त्यालगत रेल्वेच्या मालकीची जागा. परवानगी मिळाल्यास महापालिका करणार रस्ता

रेल्वे प्रशासनाकडून हडपसर स्टेशनचा वापर वाढवला जाणार आहे. सध्या येथून काही रेल्वे सुटतात, तेथील रस्ते अरुंद असल्याने प्रवाशांना त्रास होतो. त्यामुळे हडपसर स्टेशनला जोडणारे तीन रस्ते रुंद करण्याची प्रक्रिया सुरू केली आहे.
- अनिरुद्ध पावसकर,
प्रमुख, पथ विभाग, महापालिका

अशी आहे स्थिती
१५०
- पुणे स्टेशनवरून सुटणाऱ्या रेल्वे

१०
- हडपसर स्टेशनवरून सुटणाऱ्या रेल्वे

१.५ लाख
- पुणे स्टेशनवरील दैनंदिन प्रवासी

१० हजार
- हडपसर स्टेशनवरील दैनंदिन प्रवासी