उच्च सुरक्षा पाटीचे ड्रायव्हिंग स्कूलना अधिकार

पुणे, ता. २५ ः पुण्यातील वाहन प्रशिक्षण संस्था (ड्रायव्हिंग स्कूल) यांनादेखील आता उच्च सुरक्षा नोंदणी पाटी बसविण्याचा अधिकार देण्यात आला आहे. पुण्यातील वाहन संख्या व बसलेल्या पाट्यांची संख्या लक्षात घेता आरटीओ प्रशासनाने हा निर्णय घेतला आहे. त्यामुळे आता प्रक्रियेला वेग येणार आहे.
हा निर्णय वाहनधारकांसाठी सोयीचा ठरेल, मात्र त्यासाठी ड्रायव्हिंग स्कूल चालकांनी संबंधित कंपनीकडे अर्ज करून केंद्र सुरू करण्याची परवानगी घेणे आवश्यक आहे. पुण्यात सुमारे २६ लाख वाहनांना उच्च सुरक्षा पाट्या बसविणे अपेक्षित आहे. मात्र आतापर्यंत केवळ दोन लाख २२ हजार वाहनांनाच पाट्या बसविण्यात आल्या आहेत. एकूण वाहनांच्या संख्येच्या तुलनेत ही संख्या खूपच कमी आहे. दरम्यान, वाहनधारकांच्या सोयीसाठी आम्ही वारंवार केंद्र वाढविण्याची मागणी केली होती, तसेच १ एप्रिल २०२९ नंतर वाहनांची नोंदणी झालेल्या वाहनांना जर वाहन विक्रेत्यांनी नंबर प्लेट जोडली नसेल तर त्यांनी जोडावी, अशीदेखील आमची प्रमुख मागणी असल्याचे राजू घाटोळे यांनी सांगितले.

अशी आहे स्थिती
- सध्या पुण्यात उच्च सुरक्षा पाटी बसविण्याची केंद्रे १७०
- मुळात केंद्रांची संख्या तोकडी
- शिवाय काही केंद्रांवर असलेल्या अडचणींमुळे वाहनधारकांना नवीन पाटी बसविण्यासाठी करावी लागते सुमारे दोन महिन्यांची प्रतीक्षा
- पुण्यात सुमारे ३०० ड्रायव्हिंग स्कूल
- त्यांनी ‘एचएसआरपी’ केंद्रे सुरू केल्यास वाहनधारकांना मोठा लाभ
- वाहनांना पाटी बसविण्याचे काम अधिक वेगाने होईल

वाहनधारकांच्या सोयीसाठी ड्रायव्हिंग स्कूल चालकांनादेखील ‘एचएसआरपी’ केंद्र सुरू करण्यास मान्यता दिली आहे. ज्यांना केंद्र सुरू करायचे आहे त्यांनी संबंधित कंपनीशी संपर्क साधावा.
- स्वप्नील भोसले, उपप्रादेशिक परिवहन अधिकारी, पुणे

हा निर्णय चांगला आहे. मात्र यातून मिळणारा नफा हा कमी आहे. शिवाय वाहने लावण्यासाठी मोठ्या जागेची आवश्यकता आहे. अनेक संस्थांकडे आवश्‍यक जागा नाही. त्यामुळे याला कितपत प्रतिसाद लाभेल, याबाबत साशंकता आहे.
- विठ्ठल मेहता, महाराष्ट्र राज्य ड्रायव्हिंग स्कूल ओनर असोसिएशन, कार्याध्यक्ष, पुणे