जुने सातबारा, फेरफार आता ऑनलाइन

पुणे, ता. २६ : तुम्ही एखादी जमिनी खरेदी करीत आहात... त्यासाठी त्या जमिनींची इतिहास हवा असेल, तर त्या गावाच्या अभिलेख कार्यालयात चकरा माराव्या लागतात. परंतु आता त्यांची गरज नाही. कारण आता १९३० पासूनचे सहा प्रकारचे गावनिहाय दस्त (अभिलेख) ‘आपले अभिलेख डॉट जीओव्ही डॉट इन’ या संकेतस्थळावर डिजिटल स्वरूपात उपलब्ध होणार आहेत. पहिल्या टप्प्यात हवेली आणि मुळशी तालुक्यातील सुमारे ४० लाख दस्त जिल्हा प्रशासनाने उपलब्ध करून दिले आहेत.

पुणे जिल्ह्यातील महसूल विभागातील १९३० पासूनचे जुने सहा प्रकारचे गावनिहाय दस्तांचे स्कॅनिंग करून त्यांचे मेटा-डेटा एन्ट्रीचे काम पूर्ण झाले आहेत. ते सगळे संकेतस्थळावर उपलब्ध करून दिले आहेत. संबंधित गावचे तलाठी आणि मंडळाधिकाऱ्यांकडून स्कॅन केलेल्या जुन्या महसुली अभिलेखांवर डिजिटल स्वाक्षरीचे काम सुरू असल्याची माहिती अपर जिल्हाधिकारी सुहास मापारी यांनी दिली.

नागरिकांना आपले अभिलेख या संकेतस्थळाला भेट देऊन व त्यासाठी शुल्क ऑनलाइन भरून डिजिटल स्वाक्षरी असलेले जुन्या महसुली अभिलेखाची प्रत काढता येणार असल्याचे मापारी यांनी सांगितले.

हे अभिलेख होणार उपलब्ध
- जुने सातबारा
- जुने कडई पत्रक
- जुने फेरफार
- ८ (अ) उतारा
- इनामपत्र
- जन्म-मृत्यू रजिस्टर

फायदा कोणाला होणार?
- जमीन खरेदी-विक्री करणारे नागरिक
- शेतकरी
- बांधकाम व्यावसायिक
- विकसक
- वकील व न्यायालयीन प्रक्रियेत सहभागी असलेले नागरिक

डिजिटल स्वाक्षरीसह दस्तऐवज :
- हवेली तालुक्यातील ५ लाख दस्तांवर डिजिटल स्वाक्षरी पूर्ण
- हे दस्त कायदेशीर मान्य असून, न्यायालयीन व शासकीय कामकाजासाठी ग्राह्य धरले जाणार

भविष्यातील योजना :
- पुढील सहा महिन्यांत जिल्ह्यातील १४ तालुक्यांतील सव्वातीन कोटी दस्त स्कॅन व मेटा-डेटा एन्ट्री करून संकेतस्थळावर उपलब्ध होणार आहेत.
- एकाच क्लिकवर हे सर्व अभिलेख नागरिकांना सहज उपलब्ध होतील