वेळीच उपचारांनी वाचला हात

पुणे, ता. २६ : समुद्रकिनाऱ्यावर खेळत असताना पुण्‍यातील नऊ वर्षांच्‍या मुलीच्‍या हाताला जेलीफिशचा दंश झाला. सुरुवातीला कुटुंबीयांनी ही किरकोळ बाब म्हणून दुर्लक्ष केली. मात्र, दोन दिवसांत या मुलीचा हात मोठ्या प्रमाणार सुजला व स्थिती गंभीर बनली. जहाँगीर रुग्‍णालयातील डॉक्‍टरांनी उपचार करून तिचा हात वाचविला.

रुग्‍णालयातील बालरोगतज्ज्ञ डॉ. सागर लाड यांनी तपासणी करून तिला हाताचे शस्त्रक्रियातज्ज्ञ डॉ. विजय मालशिकरे यांच्याकडे पाठवले. तपासणीनंतर डॉ. मालशिकरे यांनी या मुलीच्या हातात ‘इम्पेंडिंग कॉम्पार्टमेंट सिंड्रोम’ असल्याचे निदान केले. ही एक अत्यावश्यक शस्त्रक्रिया करावी लागणारी वैद्यकीय परिस्थिती असते. कारण, कॉम्पार्टमेंट सिंड्रोममुळे एखाद्या स्नायूंच्या भागात जास्त दाब निर्माण झाल्यास रक्तप्रवाह खंडित होतो व ऊतींचं नुकसान होते.

या मुलीच्या बाबतीत तिच्या हातातील स्नायूंमध्ये आधीच नुकसान सुरू झाले होते. यावर तातडीने उपचार न केल्यास हात कायमस्वरूपी निकामी होऊ शकला असता, पण डॉ. मालशिकरे यांनी तातडीने ‘फॅसिओटॉमी’ शस्त्रक्रिया करून हातातील प्रमुख रक्तवाहिन्यांवरचा दाब कमी केला, कारण त्या आधीच आकुंचन पावलेल्या होत्या. तसेच नसा वाचवण्यासाठी ही कृती आवश्यक होती. तत्काळ उपचारामुळे शस्त्रक्रिया यशस्वी ठरली व मुलीचा हात वाचला.
---------------------
बरेच जण जेलीफिशच्या दंशाला किरकोळ गोष्ट समजतात, परंतु या घटनेमुळे दाखवून दिले की जेलीफिश दंशाचे गंभीर परिणाम होऊ शकतात. यामुळे या दंशावर योग्य वेळेवर वैद्यकीय उपचार घेणे अत्यावश्यक आहे.
-डॉ. विजय मालशिकरे, शस्त्रक्रियातज्ज्ञ